ރާއްޖޭގެ އުތުރަށް ކުރައްވަމުން ގެންދަވާ ދަތުރުފުޅުގައި ހދ،. ހަނިމާދޫ ރައްޔިތުންނާއި ބައްދަލުކުރައްވާ ވާހަކަފުޅު ދައްކަވަމުން ރައީސް މުއިއްޒު ވިދާޅުވީ ރާއްޖޭގައި މަޝްރޫއުތައް ހިންގަން ކުވެއިތު ފަންޑުން ދިން ބައއް ފަންޑުތައް އަންބުރާ ގެންގޮސްފައިވާކަމަށެވެ. އެގޮތުން މިދިޔަ ސަރުކާރުން ރާއްޖޭގެ ހަތް ރަށެއްގައި އަޅަން އުޅުނު ހޮސްޕިޓަލްތައް ނޭޅި އެ މަޝްރޫއުތައް ނުހިންގުނީ ކުވައިތު ފަންޑުން ދިން ފަންޑުތައް އަންބުރާ ގެންގޮސްފައިވާތީކަމަށެވެ.
މި ވާހަކަތަކަށް ރައްދުދެއްވާ ކުރީގެ މާލީ ވަޒީރު އިބްރާހިމް އަމީރު އެކްސްގައި ކުރެއްވި ޕޯސްޓެއްގައި ވިދާޅުވީ ރައީސް މި އަދު ދެއްކެޕވި ވާހަކަތަކީ ކަނޑައެޅިގެން ދޮގެއްކަމަށެވެ. މަޝްރޫއެއް ނުހިންގިގެން އެއްވެސް ޕްރޮޖެކްޓަކަށް ކުވައިތު ފަންޑުން ދިން ފަންޑު އަނބުރާ ގެންގޮސްފައިނުވާކަމަށެވެ. އަދި ރައީސްއަށް ރަނގަޅު މައުލޫމާތު އަރުވާނެ ގާބިލް މީހަކު އައްޔަންކުރުމަށްވެސް އަމީރު ވަނީ ގޮވާލައްވާފައެވެ.
ކުވައިތު ފަންޑުގެ އެހީގައި 7 ރަށެއްގައި 30 އެނދުގެ ހޮސްޕިޓަލްތައް އިމާރާތްކުރަން ކުރީގެ ސަރުކާރުން މިދިޔަ މޭމަހުގެ ތެރޭގައި ދެ ކުންފުންޏަކާއި ވަނީ ހާވާލުކޮށްފައެވެ. އެގޮތުން ހދ. ހަނިމާދޫ، އދ. މާމިގިލި، ވ. ފެލިދޫ، ތ. ވިލުފުށީގައި އަޅާ ހޮސްޕިޓަލް އެޅުމަށް ހަވާލުކުރީ ދިވެހި ކުންފުންޏެއްކަމަށްވާ ޑެޕްލެކްސް ޕްރައިވެޓް ލިމިޑެޓާއެވެ. ށ. މިލަންދޫ، ނ. ވެލިދޫ، ކ. ތުލުސްދޫގައި އަޅާ ހޮސްޕިޓަލް އިމާރާތްކުރަން ހަވާލުކުރީ އާނަންދު ބިލްޑްޓެކް ޕްރައިވެޓް ލިމިޓެޑާއެވެ.
