މޯލްޑިވްސް ޓޮރާންސްޕޯޓު އޮތޯރިޓީން ކުރި އިއުލާނެއްގައި ބުނީ އަންނަ މަހުގެ ހަވަނަ ދުވަހުން ފެށިގެން ނުވަ ވަނަ ދުވަހަށް އެމްއެންޑީއެފް އިން ކުރިއަށް ގެންދާ އަސްކަރީ ތަމްރީން ހުޅުލޭގެ އިރުމަތީ ފަރާތުން ހަތް ނޯޓިކަލް މޭލު ބޭރުގައި ކުރިއަށް ގެންދާނެ ކަމަށެވެ.
އެގޮތުން ކޮންމެ ދުވަހެއްގެ ހެދުނު 06:00 އިން 18:00 އަށް އެތަމްރީނު ތައް ކުރިއަށް ގެންދާނެ ކަމަށް އެއޮތޯރިޓީން ވަނީ ބުނެފައެވެ. އެތަމްރީންގައި ހުޅުލޭގެ އިރުމަތީ ފަރާތުން 07 މޭލު ބޭރުގައި އެމްއެންޑީއެފުން ބަޑިޖަހާނެއެވެ.
ތަމްރީންގައި މެޝިންގަން ފަޔަރިން ބޭނުން ކުރުމަށް ނިންމާފައިވާއިރު ވައިގެ ސަރަހައްދު ބޭނުންކުރެވޭނެ އެންމެ ދުރުމިނަކީ 5000 މީޓަރު ކަމަށާއި އެންމެ އުސްމިނަކީ 100 މީޓަރު ކަމަށް ޓްރާންސްޕޯޓް އޮތޯރިޓީން ވަނީ ބުނެފައެވެ. އަދި އެންމެ ތިރިން ބަޑިޖަހާނީ ސީލެވެލް އާއި ހަމައަށް ކަމަށް ވެސް އެއޮތޯރިޓީން ބުނެއެވެ.
އެއޮތޯރިޓީން ވަނީ އެތަމްރީނުތައް ކުރިއަށްދާއިރު ހުޅުލޭގެ އިރުން ކަނޑުދަތުރުފަތުރުކުރާ ފަރާތްތަކުން އެކަމަށް ސަމާލުކަން ދިނުމަށް އެދިފައެވެ.
