އެ ކައުންސިލުން ބުނީ މާލެ ޒީނަތްތެރި ކުރުމަށްޓަކައި މާލޭގެ ބޭރު މަގުގައި ޖަހާފައިވާ ކަދުރު ރުއްތަކަށް އަލިކުރުމަށް 600 ލައިޓް ހޯދުމަށް ބޭނުންވާކަމަށެވެ. މިކަން ކޮށްދޭން ޝައުގުވެރިވާ ފަރާތްތަކަށް މައުލޫމާތު ދިނުން އަންނަ ހޯމަދުވަހު 11:00 ޖަހާއިރު އޮންނާނެކަމަށް ސިޓީ ކައުންސިލުން ބުނެއެވެ. އަދި އަންދާސީ ހިސާބު ހުށައަޅަންޖެހޭނީ އެދުވަހު މެންދުރު 14:00ޖަހާއިރު ކަމަށްވެސް އެ ކައުންސިލުން ބުނެއެވެ.
މާލޭގެ ބޭރު މަގުގައި ކަދުރު ރުއް ޖެހީ ޑރ މުހައްމަދު މުއިއްޒުގެ މޭޔަރުކަމުގައެވެ.
މާލެ ފެހިކުރުމުގެ ނަމުގައި އިންދި ރުއްތަކުގެ ފަންތައް ދަނީ ހިކެމުންނެވެ. އެ ރުއްތަކުގެ ބާވަތުން އެ ރުއްތައް ރަނގަޅަށް ނުހެދޭނެކަމަށް ގަސްގަހާގެހީގެ ތަޖުރިބާކާރުން ބުނެއެވެ. އެހެންނަމަވެސް އޭރު މޭޔަރަކަށް ހުންނަވާ މުއިއްޒު ވިދާޅުވީ ކަދުރު ރުއްތަކުގެ ފަންތައް ހިކެމުން ދަނީ އެ ދުވަސްވަރު އެ ރުއްތަކަށް ލޮނު ބުރާތީ ކަމަށެވެ. އަދި މާ ބޮޑުކަމެއް ނުކޮށް ފެން ޖަހާލުމުން ވެސް މައްސަލަ ހައްލުވާނެ ކަމަށް އޭރު މުއިއްޒު ވިދާޅުވިއެވެ.
އެހެންނަމަވެސް ދައުލަތުން އެތައް މިލިއަނެއް ހޭދަކޮށްގެން ގެނެސް އިންދި ގިނަ ރުއްތަކުން އަދިވެސް ފެންނަމުން ދަނީ ފަންތައް ހިކޭ ތަނެވެ.
