ވެރިކަން ހިންގާ ޕީޕީއެމް / ޕީއެންސީ ކޯލިޝަނުން ބޭއްވި ޖަގަހަ ޖަލްސާއެއްގައި ވާހަކަދައްކަމުން ފަޒުލް ވިދާޅުވީ އޭނާ އެޗްޑީސީއާ ހަވާލުވުމަށްފަހު ދެވަނައަށް ކުރެއްވި މަސައްކަތަކީ ހުޅުމާލެއިން ދޫކުރި ބިންތަކަށް ވީ ގޮތެއް ބެލުންކަމަށެވެ.
ފަޒުލް ވިދާޅުވީ މިދިޔަ ސަރުކާރުން ހިނގި ބިންވެރިޔާ ސްކީމުގެ ދަށުން ވިޔަފާރީގެ އުސޫލުންނާއި ނުހައްގުން 50 ބިން ދޫކޮށްފައިވާކަމަށެވެ.
ފަޒުލް ވިދާޅުވީ މި ވާހަކަތައް ތަކުރާރުކޮށް ދައްކަން ޖެހޭކަމަށާއި މިވާހަކަތައް މިރައްޔިންނާއި ހަމައަށް ނުގެނެސް ދެން ކުރިޔަށް ދެވެން ނެތްކަމަށެވެ. އަދި އެ ބިންތައް ދޫކުރީ ކޮންބަޔަކަންވެސް އާއްމުކުރާނެކަމަށްވެސް ފަޒުލް ވިދާޅުވިއެވެ.
ޕީޕީއެމް / ޕީއެންސީން ބޭއްވި ޖަގަހަ ޖަލްސާގެ ތެރެއިން
ބިންވެރިޔާ ސްކީމްގެ ދަށުން ދޫކުރި ބިންތައް ހުރި ސަރަހައްދު ބަލާލަން އިއްޔެ ދިޔަކަން ފާހަގަކުރައްވަމުން ފަޒުލް ވިދާޅުވީ އެ ޕްލޮޓްތައް ގޮސް އަރަނީ ޖެހިގެން ހުރި ވެލި ހިލަ ފަރުބަދަތަކަކަށް ކަމަށެވެ. ފަޒުލް ވިދާޅުވީ ބިންތައް ހަވާލުކުރެވެން އޮތީ އެ ވެލިފުނިތައް ހުސްކޮށްގެންކަމަށާއި އެކަން މި ސަރުކާރުން ކުރާނެކަމަށްވެސް ފަޒުލް ވިދާޅުވިއެވެ.
ރޭ ޖަގަހަ ޖަލްސާގައި ވާހަކަ ދައްކަވަމުން ފަޒުލްވަނީ އެޗްޑީސީގެ ބެލުމުގެ ދަށުން ހިންގާ ބިން ހިއްކުމުގެ މަސައްކަތްތައް ހުއްޓިފައިވާކަމަށް ބުނާ ބުނުންތަަކަށްވެސް ރައްދުދީފައެވެ. ފަޒުލް ވިދާޅުވީ ބިން ހިއްކުމުގެ މަސައްކަތްވެސް ކުރިޔަށްދާކަމަށާއި އެހެންނަމަވެސް ހާލަތު އޮތްގޮތުން މަސައްކަތް ރާވާފައިވާ ގޮތަށް ބައެއް ބަދަލުތައް ގެނެސްފައިވާކަމަށެވެ.
