ރައީސް މިހާރު ބ. އަތޮޅަށް ކުރައްވަމުން ގެންދަވާ ދަތުރުފުޅުގެ ތެރެއިން މިއަދު ކެންދޫ އަށް ވަޑައިގެން ބޭއްވި ޖަލްސާގައި ވާހަކަދައްކަވަމުން ވިދާޅުވީ، ސަރުކާރު ހިއްސާވާ ކުންފުނިތަކުގެ ،މާލީ ހާލަތު އޮތީ ވަރަށް ދެރަ ހާލަތެއްގައިކަމަށާއި އެހެންކަމުން ކުންފުނިތަކުގެ މާލީ ޙާލަތު ރަނގަޅުކޮށް، ފައިދާވާ ކުންފުނިތަކަކަށް ހެދުމަކީ ސަރުކާރުގެ އަމާޒުކަމަށެވެ. އަދި އެއާއެކުއެކީގައި އިގުތިސޯދަށް އިތުރު ފައިސާ ވަންނާނެ މަސައްކަތްތައްވެސް ފައްޓާވާފައިވާކަމަށް އެމަނިކުފާނު ވިދާޅުވި އެވެ.
މުއިއްޒު ވިދާޅުވީ އެމަނިކުފާނު ވެރިކަމާއި ހަވާލުވެވަޑައިގަތްއިރު ރަށްރަށުގެ ވަރަށް ގިނަ ޕްރޮޖެކްޓްތައް ހުރީ ހުއްޓިފައިކަމަށެވެ. އެ މަސައްކަތްތައް ހުއްޓިފައިހުރީ މަސައްކަތްކުރި ކުންފުނިތަކަށް ސަރުކާރުން ދައްކަންޖެހޭ ފައިސާ ނިމިދިޔަ ސަރުކާރުން ނުދައްކާ އޮތުމުންކަމަށެވެ.
ރައީސް ވިދާޅުވީ ސަރުކާރުން އަމިއްލަ ކުންފުނިތަކަށް ދައްކަންޖެހޭ 9 ބިލިއަން ރުފިޔާ ނުދައްކާ އޮތްކަމަށާއި، ހަމައެކަނި ފެނަކަ ކުންފުނިންވެސް 4 ބިލިއަން ރުފިޔާ އެކި ކުންފުނިތަކަށް ނުދައްކާ އޮތްކަމަށެވެ. އަދި އެކަމުގެ ސަބަބުން ރައްޔިތުންނަށް ލިބެންޖެހޭ އެތައް ޚިދުމަތެއް ނުލިބި އޮތްކަންވެސް ލިބުމާއި ހަމައަށް ނުގޮސް އެތައް މަސައްކަތެއް އެބަހުރިކަމަށް ރައީސުލްޖުމްހޫރިއްޔާ ވިދާޅުވި އެވެ.
