އެމަނިކުފާނު މިފަދައިން ވިދާޅުވީ، ދިވެހި ބަހާއި ސަގާފަތާއި ތަރިކައާ ބެހޭ ވުޒާރާއިން މިއަދު ބޭއްވި ނޫސްވެރިންގެ ބައްދަލުވުމެއްގައި ވާހަކަފުޅުދައްކަވަމުންނެވެ.
އެގޮތުން، ގައުމީ ޗާޕުޚާނާ ގާއިމްކުރަން ބޭނުންވާ ވަޒީރުންގެ މަޖިލީހުގެ ހުއްދަ ލިބިފައިވާކަމަށް ވަޒީރު މައުލޫމާތުދެއްވި އެވެ. އަދި ގައުމީ ޗާޕުހާނާ ގާއިމްކުރުމަށް ބޭނުންވާ ކަރުދާސްތައް ލިބިފައިވާކަމަށްވެސް ވަޒީރު ވިދާޅުވި އެވެ.
އޭނާ ވިދާޅުވީ، މި ޗާޕުހާނާގެ އެންމެ މުހިއްމު ބޭނުމަކީ ދިވެހި ގައުމިއްޔަތާއި ތަރިކައާއި ތާރީހާއި ދިވެހީންގެ އަމިއްލަވަންތަކަމާއި ގުޅިފައިވާ އިލްމުތައް، އަދި އެ ކަންކަމާ ގުޅިފައިވާ މައުލޫމާތުތައް އެއްކުރައްވާ ބޭފުޅުންނަށް އެ ބޭފުޅުންގެ ފޮތްތައް އޭގެ ފުރަތަމަ 100 އެއްހައި ކޮޕީ ނުވަތަ 50 އެއްހައި ކޮޕީ ދައުލަތުން ޗާޕުކޮށްދިނުން ކަމަށެވެ.
ދިވެހިރާއްޖޭގައި ގައުމީ ޗާޕުޚާނާއެއް ގާއިމްކުރުމަކީ ރައީސް މުހައްމަދު މުއިއްޒުގެ ހަފްތާ 14 ގައި ހިމަނުއްވާފައިވާ ވައުދުފުޅެކެވެ.
