އެމަނިކުފާނު މިހެން ވިދަޅުވީ މިހާރު ފެލިދެ އަތޮޅަށް ކުރައްވަމުން ކުރައްވާ ދަތުރުގައި އެ އަތޮޅު ކެޔޮދޫ ރައްޔިތުންނާއި ބައްދަލުކުރައްވާ ވާހަކަދައްކަވަމުންނެވެ.
ރައީސް ވިދާޅުވީ ރަށްރަށުގައި ހިންގާ ގެސްޓު ހައުސްތަކާއި ލޯކަލް ޓްއަރިޒަމުން ޓީޖީއެސްޓީގެ ގޮތުގައި ލިބޭ އާމްދަނީން ބައެއް ކައުންސިލްތަކަށް ދިނުމަށް ލާމަރުކަޒީ ގާނޫނާއި ޓްއަރިޒަމް ގާނޫނަށް އިސްލާހި ހުށައެޅުއްވުމަށް ގަސްތުކުރައްވާކަމަށެވެ.
ރައީސް ވިދާޅުވީ އެކި ދާއިރާތަކުން މިރާއަށް ޓެކްސްގެ ގޮތުގައި ލިބޭ އާމުދަނީ ބަކި އަދަދެއް ސީދާ ކައުންސިލްތަކުގެ އެކައުންޓަށް ޖަމާކުރަން އިސްލާހު ގެންނަވާނެކަމަށެވެ. އަދި މި ބަދަލު ގެނައުމުން ކައުންސިލްތަކުގެ ބަޖެޓަށް އިތުރު ފައިސާ ލިބިގެންދާނެކަން ރައީސް ފާހަގަކުރެއްވިއެވެ.
އެހެންނަމަވެސް ރައްޔިތުންނަށް ކަންކަން ކޮށްދެެވޭނީ ރައްޔިތުން މަޖިލިސް ދިނުމުންކަމަށް ރައީސް ވިދާޅުވިއެވެ. އަދި މަޖިލިސް ސަރުކާރަށް ދިނުމަށްވެސް ރައީސް ވަނީ އެދިވަޑައިގެންފައެވެ.
ކެޔޮދޫ ރައްޔިތުންނާއި ވާހަކަދައްކަވަމުން ރައީސް ވަނީ އެރަށުގެ ބިން ހިއްކުން މިއަހަރު ފަށާނެކަމަށް ވިދާޅުވެފަ އެވެ. އަދި ސްކޫލަށް ބޭނުންވާ 4 ބުރީގެ އިމާރާތުގެ މަސައްކަތްވެސް މި އަހަރު ފަށާނެކަމުގެ ޔަގީންކަން ވަނީ ރައީސް ދެއްވާފަ އެވެ.
ލާމަރުކަޒީ ނިޒާމުގެ ތެރެއިން ހަގީގީ މާނައިގައި ކައުންސިލްތައް ބާރުވެރި ކުރުވުމަކީ ރައީސްގެ މުހިންމު ސިޔާސަތެކެވެ.
