މަސްވެރިން ކިރުވާފައިވާ މަހަށް ފައިސާ ނުދީގެން މަސްވެރިން ނުކުމެ ކޫއްޑޫ ފިޝަރީޒް ކޮމްޕެލެކްސް އާއި އައްޑޫ ފިޝަރީޒް ކޮމްޕެލެކްސްގެ އޮޕަރޭޝަންތައް ވަނީ މިދިޔަ މަހު 4 ދުވަހަށް ހުއްޓުވާލާފައެވެ. އެ އިހްތިޖާޖުތަކާއި ގުޅިގެން ވަޒީރު ޝިޔާމް މަސްވެރިންނާއި ބައްދަލުކޮށް އޭރު ވިދާޅުވީ މިމަހުގެ 5 ވަނަދުވަހުގެ ކުރިން މަސްވެރިންނަށް ދޭންޖެހޭ ހުރިހާ ފައިސާ ދީ ނިންމާނެކަމަށެވެ.
މި ސަރުކާރުގެ ފުރަތަމަ 100 ދުވަހު މަސްވެރިކަމާއި ބެހޭ ވުޒާރާއިން ހާސިލުކުރި ކަންކަން ހާމަކުރުމަށް ބޭއްވި ނޫސްވެރިންގެ ބައްދަލުވުމުގައި ވާހަކަދައްކަވަމުން ވަޒީރު ޝިޔާމް ވިދާޅުވީ އޭރު ބުނިދުވަހަށް ހުރިހާ ފައިސާ ނުދެވުނުނަމަވެސް ރޯދައިގެ ކުރިން ހުރިހާ ފައިސާއެއް ދީ ނިންމާނެކަމަށެވެ.
ޝިޔާމް ވިދާޅުވީ މިމަހުގެ 5 ވަނަދުވަހުވެސް މަސްވެރިންނަށް ދޫކުރުމަށް 50 މިލިއަން ހަމަޖައްސާ އެ ފައިސާ ދޫކުރަމުން އަންނަކަމަށެވެ. އަދި އެ ފައިސާއަކީ މިދިޔަ ޖެނުއަރީ މަހުގެ 26ގެ ނިޔަލަށް ކިރާފައިވާ މަހަށް ދޭންޖެހޭ ފައިސާކަންވެސް ވަޒީރު ފާހަގަކުރެއްވިއެވެ.
މިމަހުގެ 3 ވަނަދުވަހު ދުވާފަރު ރައްޔިތުންނާއި ބައްދަލުކުރައްވާ ވާހަކަދައްކަވަމުން ރައީސް މުއިއްޒު ވިދާޅުވެފައިވަނީ މަސްވެރިންނަށް ނުދެވި ހުރި ފައިސާ ދިނުމަށް މަސްވެރިކަމާއި ބެހޭ ވުޒާރާއާ ސަރުކާރުގެ ބޮޑު ކުންފުންޏަކާއި ގުޅިގެން ފައިނޭންސް ހަމަޖެއްސުމުގެ މަސައްކަތް ކުރަމުން ދާކަމަށެވެ.
