ތިމާވެއްޓާ ރައްޓެހި ކޮންސެޕްޓަކަށް ރަސްމާލެ ތަރައްގީކުރައްވާނެކަމަށް ސަރުކާރުން ހާމަކުރައްވާފައިވާއިރު މި މަސައްކަތް ކުރަމުންދަނީ އެޗްޑީސީއިންނެވެ. ދައުލަތުގެ ބަޖެޓުން ހަރަދުނުކޮށް 1150 ހެކްޓަރުގެ ބިން ހިއްކުމަށް ބަދަލުގެ ގޮތުގައި 50 އަހަރަށް 70 ހެކްޓަރުގެ ބިން އެކުންފުނިތަކަށް ދިނުމަށް މި މަޝްރޫޢުގެ އެއްބަސްވުމުގައި ވަނީ ހިމަނާފަ އެވެ.
އަދި މި މުއްދަތުގެ ތެރޭގައި އެއްވެސް ޙާލަތެއް ކުރިމަތިވެއްޖެނަމަ ބިން އަނބުރާ އެޗް.ޑީ.ސީއަށް ނެގޭނެކަމަށްވެސް މި އެއްބަސްވުމުގައި ހިމަނާފައިވާކަމަށް އެޗް.ޑީ.ސީއިން މައުލޫމާތުދެ އެވެ.
ރަސްމާލޭގެ ތަފްސީލު ހިއްސާކުރައްވަމުން ރައީސް މުއިއްޒު ވިދާޅުވީ ރަސްމާލެ މަޝްރޫއަކީ މާލެއަށް ދިމާވެފައިވާ ބޯހިޔާވަހިކަމުގެ މައްސަލައަށް ހައްލެއް ލިބިގެންދާނެ މަޝްރޫއެއް ކަމަށާއި އެރަށާއި މާލެއާއި ގުޅާލެވޭނެ ކަމަށެވެ. އެގޮތުން ރަސްމާލެ އާއި މާލެ ގުޅާލުމަށްޓަލައި ފަންނީ މަސައްކަތްތައް މިހާރު ފެށިފައިވާ ކަމަށްވެސް ރައީސް ވިދާޅުވި އެވެ. އަދި އެމަސައްކަތް ކުރުމަށް ވަރަށް ގާބިލު ކުންފުނިތަކާ މަޝްވަރާ ކުރެވެމުންދާކަންވެސް އެމަނިކުފާނު ފާހަގަކުރެއްވި އެވެ.
ރަސްމާލެ އާއި މާލެ ގުޅާލުމުގެ ގޮތުން ސަރުކާރުން ނިންމާފައިވަނީ ކަނޑުއަޑީގެ ޓަނަލެއް ހަދަން ކަން ފާހަގަކުރައްވައި ރައީސް ވިދާޅުވީ އެ މަޝްރޫއު ވެގެންދާނީ ފަތުރުވެރިން ވެސް ޝައުގުވެރިކުރުވާނެ މަޝްރޫއަކަށް ކަމަށެވެ.
ރައީސް މުއިއްޒުގެ އެޑްމިނިސްޓްރޭޝަން "ހަފްތާ 14"ގެ މަގުޗާޓުގެ ދަށުން ހައުސިން މިނިސްޓްރީ އަށް ލިބިފައިވާ ކުރިއެރުންތައް ހިއްސާކުރުމަށް މިއަދު ބޭއްވި ނޫސްވެރިންގެ ބައްދަލުވުމުގައި ވާހަކަ ދައްކަވަމުން މިނިސްޓަރު ހައިދަރު ވިދާޅުވީ މިއީ ވަރަށް ބޮޑު މަޝްރޫއެއް ކަމަށެވެ. އެހެން ކަމުން ވަރަށް ގިނަ ކަންތައްތަކަކަށް ރިއާޔަތް ކުރައްވަން ޖެހިވަޑައިގަންނަވާ ކަމަށް މިނިސްޓަރު ވިދާޅުވި އެވެ. ރަސްމާލެ އިކޯ ސިޓީއެއްގެ ގޮތުގައި ތަރައްގީ ކުރާތީ ކުރަންޖެހޭ ތަހުލީލުތައް ވެސް އެބަހުރި ކަމަށް މިނިސްޓަރު ވިދާޅުވި އެވެ.
ފުށިދިއްގަރު ފަޅުގެ ސިޓީ، "ރަސްމާލެ" މަޝްރޫއަކީ ރާއްޖޭގެ އިގްތިސޯދުގެ މޫނުމަތި ބަދަލުކޮށްލާނެ ބިޔަ ބޮޑު މަޝްރޫއަކަށެވެ. މި މަޝްރޫއުގެ ސަަބަބުން ރާއްޖޭގެ ހައުސިން ސިނާއަތަށް އިންގިލާބީ އަދި ތާރީހީ ބޮޑު ކުރި އެރުމެއް ލިބޭނެ އެވެ.
ރަސްމާލޭގެ ހާއްސަ ސިފަތަށް:
- ރަސްމާލެއަކީ 20 އަހަރުގެ ޕްލޭނެއް ހިމެނޭ ސިޓީއެއް
- ހުޅުމާލޭގެ ދެ ފޭސްއަށް ވުރެ ތިން ގުނަ ބޮޑު ސަރަހައްދެއް
- އެއްފަހަރާ 65،000 ރައްޔިތުންނަށް ބޯހިޔާވަހިކަން
- މި މަޝްރޫއަށް 1280 ހެކްޓަރުގެ ބިން ހިއްކާނެ
- އަށް މަސް ތެރޭ ބިން ހިއްކާ ނިމޭނެ
- އެ ސިޓީ ތަރައްގީ ކުރަނީ މާލެ ނައިސް ވާނެ މިންވަރަށް
- ފުރިހަމަ ފެރީ ނިޒާމެއް އޮންނާނެ
- ވިޔަފާރި އަދި ކުޅިވަރަށް ހާއްސަ ސަރަހައްދެއް ތަރައްގީ ކުރާނެ
- އާ ސިޓީ ހަދަނީ ރައީސް މުއިއްޒުގެ ބޯހިޔާވަހިކަމުގެ "ޓޯޓަލް ސޮލިއުޝަން"ގެ ސިޔާސަތުގެ ދަށުން
- ހައުސިން ސިނާއަތަށް އިންގިލާބީ އަދި ތާރީހީ ބޮޑު ކުރި އެރުމެއް ލިބޭނެ
- ރަސް މާލެ ބްރޭންޑް ކުރަނީ އިކޯ ސިޓީއެއްގެ ގޮތުގަ
- މުޅި ސިޓީ އޮންނާނީ ތިމާވެއްޓާ ރަހުމަތްތެރިކޮށް
- ރަސްމާލެއާ ކައިރީގައި އެއާ ސްލިޕެއް
- ރަށް ތަރައްގީ ކުރަނީ ސޭފް އައިލެންޑެއްގެ ގޮތުގައި
- މި ސިޓީގައި 1600 އަކަފޫޓްގެ 11،000 ގޯއްޗާއި 1400 އަކަފޫޓްގެ 20،000 ފްލެޓް
- ޔޮޓް މެރީނާ އާއި ކްރޫޒް ޓާމިނަލް ހިމެނޭނެ
- ގެސްޓްހައުސް އާއި ޓޫރިޒަމަށް ހާއްސަ ވަކި ދެ ރަށެއް އެ ފަޅުގައި ތަރައްގީކުރާނެ