ފިޝަރީޒް މިނިސްޓްރީން މިއަދު ބޭއްވި ނޫސްވެރިންގެ ބައްދަލުވުމެއްގައި ވާހަކަ ދައްކަވަމުން ފިޝަރީޒް މިނިސްޓަރު އަހްމަދު ޝިޔާމް ވިދާޅުވީ، މިފްކޯއިން ވަނީ ނުވަ އައިސްޕްލާންޓެއް ގާއިމުކުރުމުގެ މަސައްކަތް ފެނަކައާ ހަވާލުކޮށްފައި ކަމަށެވެ.
ނަމަވެސް، އޭގެ ތެރެއިން ބައެއް އައިސްޕްލާންޓްތަކުގެ މަސައްކަތް އެއްބަސްވުމާ އެއްގޮތަށް ކުރިއަށް ނުދާކަން ފާހަގަވެ، އެއްބަސްވުންތައް ބާތިލުކުރި ކަމަށް މިނިސްޓަރު ވިދާޅުވި އެވެ.
ފެނަކައިން އައިސްޕްލާންޓުތަކާއި ހަވާލުވެފައިވަނީ ދަށް އަގެއްގައި ކަމަށާއި، އެއަގުގައި އެމަސައްކަތް ކުރިއަށް ނުގެންދެވޭނެ ކަމަށް ފެނަކައިން ވިދާޅުވެފައިވާ ކަމަށާއި، އެހެންކަމުން މި މަޝްރޫޢުތައް ކުރިއަށްގެންދިޔުމަށް މިފްކޯއާ ހަވާލުކުރައްވާފައިވާ ކަމަށެވެ.
ރާއްޖޭގެ 9 ސަރަހައްދެއްގައި އައިސްޕްލާންޓް އެޅުމުގެ މަސައްކަތް މިހާރުވެސް ކުރިޔަށްއެބަދެ އެވެ. މި މަސައްކަތް ކުރިޔަށް އޮތް 6 މަސްދުވަހުގެ ތެރޭގައި ނިންމާލެވޭނެ ކަމަށް ފިޝަރީޒް މިނިސްޓްރީގެ ސްޓޭޓް މިނިސްޓަރ މުހައްމަދު މުއްތަލިބު މީގެ ކުރިން ވިދާޅުވެފައިވެ އެވެ.
