އައްޑޫގެ ކަރަންޓް ހާލަރު ގޯސްވެ ހޯމަ ދުވަހުން ފެށިގެން ކޮންމެ ދުވަހަކު އެކި ސަރަހައްދުތަކުން ކަރަންޓްގެ އަންނަނީ ކަނޑަމުންނެވެ.
މިކަމާއި ގުޅިގެން އައްޑޫގެ މޭޔަރު އަލީ ނިޒާރު ވިދާޅުވީ އައްޑޫގެ ކަރަންޓާއި ، ފެނާއި ނަރުދަމާގެ ހާލަތު ވަނީ ކަންބޮޑުވުން އޮތް މިންވަރަށް ނިކަމެތިވެ ، މަރާމާތާއި ، އަޕްގުރޭޑިންއަށް ބޭނުންވެފައިކަމަށެވެ. ފެނުގެ ރިޒާވެއް ނެތް އިރު ކަރަންޓް ލިބުންވެސް ހުއްޓުމަކަށް އައިސްފައިވާކަމަށް މޭޔަރު ވިދާޅުވިއެވެ.
މޭޔަރު ނިޒާރު ވިދާޅުވީ އައްޑޫ ސިޓީގެ ކަރަންޓްގެ ހިދުމަތް ފެނަަކައާއި އަޅުވާ ދޫކުރެވިގެން ނުވާނެކަމަށެވެ. އަދި އެއީ ވިޔަފާރި އުސޫލުން ދޭންޖެހޭ ކަމެއް ނޫންކަމަށްވެސް ނިޒާރު ވަނީ ވިދާޅުވެފައެވެ. ނިޒާރު ވިދާޅުވީ މިކަމަށް ހައްލެއް ނުލިބިއްޖެނަމަ އައްޑޫ ރައްޔިތުން ބޮޑު ކާރިސާއެއްގެ ދިގު މުއްދަތަކަށް ތިބެންޖެހުމުގެ ބިރުވެރިކަން އެބައޮތްކަމަށެވެ.
އައްޑޫ ސިޓީއަށް ކަރަންޓް ދެމުން އަންނަ ފެނަކައިން ބުނީ އެ ސިޓީން ކަރަންޓް ކަނޑަމުން އަންނަނީ ސެންޓްރަލް ޕަވަރ ޕްލާންޓްގެ 1 މެގަވޮޓްގެ ޖަނެރޭޓަރަކަށް ދިމާވި މައްސަލަ އަކާއި ގުޅިގެންކަމަށެވެ. މި ޖަނެރޭޓަރުގެ މައްސަލަ ހައްލުކުރުމުގެ އިތުރުން 2 މެގަވޮޓްގެ ޖަނަރޭޓަރެއްގެ މަރާމަތުގެ މަސައްކަތްވެސް ކުރިޔަށްދާކަމަށް ފެނަކައިން ބުނެއެވެ.
މިދިޔަ 2 މަހެއްހާ ދުވަހުގެ ތެރޭގައި ފެނަކައިން ކަރަންޓް ދެމުން އަންނަ ބައެއް ރަށްތަކުން ކަރަންޓް ކެނޑުމުގެ މައްސަލަތައް ވަނީ ދިމާވެފައެވެ. އެގޮތުން ފުވައްމުލަކު ކަރަންޓްދޭ ޓްރާންސްފޯމަރެއް ފަޅައިގެން ގޮސް އެރަށަށް ދިމާވީ ކަރަންޓްގެ މައްސަލަ ހައްލުކުރީ ކޮންމެ ދުވަހަކު ކަރަންޓް ކަނޑާތާ މަސްދުވަސްފަހުން ރައްޔިތުން މުޒާހަރާއަށް ނުކުތުމުންނެވެ. އަދި ދާދި ފަހުން ނައިފަރާއި ދުވާފަރުގެ ކަރަންޓަށް ދިމާވި މައްސަލަތައް ފެނަކައިން ހައްލުކޮށްފައިވަނީ ދުވަސްތަކެއް ފަހުންނެވެ.
