ހުޅުމާލޭގެ ދެކުނު ދާއިރާއަށް ކުރިއަށް އޮތް 20 ވަނަ ރައްޔިތުންގެ މަޖިލީހުގައި ވާދަކުރަން ނިންމަވާފައިވާ ފިރުޝާން ވިދާޅުވީ, ހުޅުމާލެއަކީ ބޯހިޔާވަހިކަމަށް އުފެއްދި ރަށެއްކަމަށެވެ. ފިރުޝާން ވިދާޅުވީ ހުޅުމާލޭގެ ރައްޔިތުންގެ މެދުގައި އެކިކަހަލަ މައްސަލަތައް އެބަހުރި ކަމަށެވެ.
ހުޅުމާލޭގައި ހުނަރުވެރި ރައްޔިތުންތަކެއް ދިރިއުޅެމުން އަންނަކަމަށްވެސް އޭނާ ވިދާޅުވިއެވެ.
"ހުޅުމާލެއަކީ ޔުނީކު ސިފަތަކެއް ހުރި ރަށެއް. ބޯހިޔާވަހިކަމަށް އަޅުގަނޑުމެން އުފެއްދި ރަށެއް. މި ރަށުގެ ރައްޔިތުންގެ މެދުގައި އެކިކަހަލަ މައްސަލަތައް އެބަހުރި. އެކިކަހަލަ ހުނަރުތައް އެބަހުރި. މި ރަށް އާބާދުވެފަ އޮތީ ރާއްޖޭގެ އެކި ކަންކޮޅުތަކުގެ ފިކުރާ, އެކި ހިޔާލާ, އެކި މިޒާޖާ ވިސްނުމުގެ މައްޗަށް. މިރަށުގަ ކުރަން އޮން އެންމެ މުހިންމު ކަމަކީ ރަށްވެހިކަމުގެ ރޫހު މިރަށުގަ އުފެއްދުން," ފިރުޝާން ވިދާޅުވިއެވެ.
ފިރުޝާން ވިދާޅުވީ ހުޅުމާލެ އާބާދުވެފައި އޮތީ އެކިފިކުރާ އެކި ހިޔާލާ އެކި މިޒާޖާ އެކިވިސްނުމުގެ މައްޗަށްކަމަށާއި މިހެންކަމުން ހުޅުމާލޭގައި ކުރަންވެފައި އޮތް އެންމެ މުހިންމުކަމަކީ ރަށްވެރެހިކަމުގެ ރޫހު އުފެއްދުންކަމަށެވެ. އެހެން ރަށްރަށް ފަދައިން ތޮބީއީގޮތުން އަސާސްތަކާއި އުސޫލުތައް ވެސް ހުޅުމާލޭގައި އުފައްދަން ޖެހޭކަމަށް ފިރުޝާން ވިދާޅުވިއެވެ.
ރާއްޖޭގައި ހަމައެކަނި ކުންފުންޏަކުން ހިންގާ ރަށަކީ ހުޅުމާލޭކަމަށްވެސް އޭނާ ވިދާޅުވިއެވެ. ހުޅުމާލޭގެ ރައްޔިތުން އުޅެންޖެހިފައިވަނީ އެ ކުންފުނިން ދަމާލާ ލައިނެއް ދަމާލީމަ އެ ލައިނުގެ ތެރޭގައިކަމަށެވެ. ހުޅުމާލެއަކީ ކޯޕަރޭޓިވް ފެކްޓަރީއެއް ނޫންކަމަށްވެސް ފިރުޝާން ވިދާޅުވިއެވެ.
