މިއަދުގެ "ސީއެންއެމް ބަދިގެ" އަށް ހޮވާލެވިފައި މި ވަނީ ދިވެހިންގެ މެދުގައި މަގުބޫލު ބުއިމެއްގެ ރެސިޕީއެކެވެ. ސޫޖީ އަކީ އާދައިގެ ދުވަސްތަކުގަައިވެސް ހޫނުކޮށް ނުވަތަ ފިނި ކޮށްލައިގެން ބޮޔެލަން މީރު ބުއިމެކެވެ. ކިޔުންތެރިންނަށް ކަމުދާނެ ކަމަށް އުއްމީދު ކުރަމެވެ.
ބޭނުންވާނެ ތަކެތި:
½ ޖޯޑު ސެމޮލީނާ (ސޫޖީ)
1 ދަޅު ގެރިކިރުރަ (ގެރިކިރު ބޭނުން ކުރާނަމަ ހަކުރު ބޭނުމެއް ނޫން)
1 ޖޯޑު ކަނަމަދު (ދިގަށްވާގޮތަށް ކޮށާފައި)
1 ފިޔާ (ތުނިތުނިކޮށް ކޮށާފައި)
½ ޖޯޑު ހިކި މޭބިސްކަދުރު
2 ސައިސަމުސާ ގިތެޔޮ (ބަދަލުގައި ވެޖެޓަބަލް އޮއިލްވެސް ބޭނުންކުރެވިދާނެ)
5 ކާފުރުތޮޅި
2 ރާނބާފަތް (1/2 އިންޗި އެތިކޮޅު ކޮޅަށް ކޮށާފައި)
3 އިންޗީގެ ފޮނިތޮށި ކޮޅެއް
5 ޖޯޑު ފެން
2 ސައިސަމުސާ ވެނީލާ އެސެންސް
ތައްޔާރުކުރާނެ ގޮތް:
މަޑުގިނީގައި ތެއްޔެއްގައި ގިތެޔޮކޮޅާއި (ނޫނީ ވެޖަޓަވަލް ތެލާއެކު) ފިޔާ އަދި ރާނބާފަތް ރަތްކޮށް ލާށެވެ. ދެން މީގެތެރެއަށް ހިކި މޭބިސްކަދުރު، ކާފުރުތޮޅި، ފޮނިތޮށި، ކަނަމަދު އަޅާ އެއްކޮށްލާށެވެ. ހުރިހާ އެއްޗެއް ރަގަނޅަށް މީރުވެލުމުން މީގެތެރެއަށް ސެމޮލީނާ އަޅާ މަޑުގިނީގައި 2 މިނެޓެއްހާއިރު ކައްކާލާށެވެ.
ދެން ގެރިކިރު ދަޅު އަދި ފެންއަޅައި، އެކުއެކީ ގިރުނީމަ ދިހަ ވަރަކަށް މިނެޓު ބަހައްޓާށެވެ. ހުރިހާ އެއްޗެއް އެއްވެ ބޮކިއަރަންފެށުމުން ވެނީލާ އެސެންސްއަޅާ އެއްކޮށްލައި، އަދި ތަންކޮޅެއް މަޑު ގިނީގައި 2 މިނެޓް ކައްކާލާށެވެ.
ސޫޖީ އަކީ މި ދުވަސްކޮޅު ގޭގައި ތަޖުރިބާކޮށްލަން ރަނގަޅުވާނެ އެވެ. އާއިލާއަށް ރޯދަވީއްލުމަކަށް ދައުވަތު ދޭ ދުވަހެއްގެ މެނޫ އަށް އެޑް ކޮށްލާށެވެ.
