އިންޑިޔާގެ ގައުމީ ފުޓްބޯޅަ ޓީމުގެ ހުރިހާ ކުޅުންތެރިންގެ ފަރާތުން، ޕީއެމް ކެއާޒް ފަންޑަށް ފައިސާގެ އެހީ ދިންކަން އިއުލާން ކުރީ ރޭ، އިންޑިޔާގެ ކެޕްޓަން ސުނިލް ޗެތްރީއެވެ. މިކަން އިއުލާން ކުރަމުން ޗެތްރީ ކުރި ޓްވީޓްގައި ބުނެފައިވަނީ، މިއީ އެކަކު އަނެކަކަށް އެހީތެރިވެދޭންވީ ވަގުތުކަމަށެވެ.
ޕީއެމްކެއާ ފަންޑަށް އިންޑިޔާގެ ފުޓްބޯޅަ ކުޅުންތެރިން ހަދިޔާ ކުރީ ކިހާވަރެއް ކަމެއް ހާމަކޮށްފައެއް ނުވެއެވެ. ފުޓްބޯޅަ ކުޅުންތެރިންގެ އިތުރުން އެހެން ކުޅިވަރުތަކުގެ އެތްލީޓުންވެސް އަދި އިންޑިޔާގެ ބޮޑެތި ބައެއް ކުލަބުތަކާއި މަޝްހޫރު މީހުންވެސްވަނީ ޕީއެމް ކެއާޒް ފަންޑަށް އެތައް މިލިއަން ރުޕީސްއެއް ހަދިޔާކޮށްފައެވެ.
ކޮރޯނާ ވައިރަހާއި ގުޅިގެން ދުނިޔޭގެ ގިނަ ގައުމުތަކެކޭ އެއްގޮތަށް އިންޑިޔާވެސްވަނީ ހުއްޓުމަކަށް އައިސްފައެވެ. މިދިޔަ މަހު ފަހުކޮޅު އިންޑިޔާއިންވަނީ ކޮރޯނާއާއި ގުޅިގެން އެކާވީސް ދުވަހުގެ ކާފިއުއެއްވެސް އިއުލާންކޮށްފައެވެ. އިންޑިޔާގައި މިހާތަނަށް މި ބައްޔަށް ހާހަކަށްވުރެ ގިނަ މީހުން ޕޮޒިޓިވްވެ، ތިރީހަށްވުރެ ގިނަ މީހުންވަނީ މަރުވެފައެވެ.
