ޒަކާތު ހައުސް އިން ވަނީ އެ އިދާރާގެ މިދިޔަ މަހުގެ ތަފާސް ހިސާބުތައް އާންމުކޮށްފައިވެ އެވެ. 

ތަފާސްހިސާބުތަކުގައިވާ ގޮތުން ފަގީރުންނާއި މިސްކީނުންނަށް ބޭސްފަރުވާގެ އެހީގެ ގޮތުގައި މިދިޔަ މަހު ވަނީ 740،805.79ރ. މުޅި ޖުމްލަ ހަރަދުކޮށްފައިވެ އެވެ. އެއީ 69 މީހުންގެ ބޭސްފަރުވާގެ ހަރަދެވެ.

30 ޕަސެންޓް ހަރަދުކުރީ ކެންސަރުގެ ބަލީގެ ފަރުވާއަށް އަށް އެހީ ދެވިފައިވާ އިރު 9.2 ޕަސެންޓް ހަރަދުކުރީ ލިވާ ޓްރާންސްޕްލާންޓަށް އަދި ދެ ޕަސެންޓް ހަރަދުކުރީ ހިތުގެ އޮޕަރޭޝަނަށް ދެވިފައިވާ ކަމަށް އެ އިދާރާއިން ނެރުން ރިޕޯޓުގައި ވެއެވެ. 

އެ އިދާރާއިން ނެރުން ރިޕޯޓުގައި ވާ ގޮތުން  ދެ ޕަސެންޓް ހަރަދުކުރީ ސިކުނޑީގެ އޮޕަރޭޝަނަށް ކަމަށާއި  ބާކީ 57.1 ޕަސެންޓް ހަރަދުކޮށްފައި ވަނީ އެހެނިހެން ބޭސްފަރުވާ އަށް ކަމުގަ އެވެ.  

ހާއްސަ ހާލަތްތައް މެދުވެރިވެގެން ހާލުގައި ޖެހޭ މީހުންނަށް ޒަކާތު ފަންޑުން ދޭ އެހީގެ ގޮތުގައި މިދިޔަ މަހު 12،7500ރ. ދީފައިވެ އެވެ.

ޒަކާތު ހައުސް އިން އިސްލާމްދީން ކުރިއެރުވުމަށާއި ދީނީ ހޭލުންތެރިކަން އިތުރުކުރުމަށް އެކިއެކި ޕްރޮގްރާމްތައް ހިންގުމަށް މިދިޔަ މަހު 374،950.28ރ. ހަރަދުކޮށްފައިވެ އެވެ.

އަދި އެ އިދާރާގެ މުވައްޒަފުންގެ މުސާރައަށް 192،432.81ރ. އަދި ޖަލްސާތަކާއި ސެމިނާތައް ބޭއްވުމަށް 93،761.61ރ. ހަރަދުކޮށްފައިވާ ކަމަށް އެ އިދާރާއިން ނެރުން ރިޕޯޓުގައިވެ އެވެ