ކޮންމެ އަހަރެއްގައި އީދު ނަމާދު ބޮޑު ޖަމާއަތުގައި މިސްކިތުގެ އިތުރުން ހުސް މައިދާންތަކުގައި އަންނަނީ ކުރަމުންނެވެ. އެގޮތުން މި އަހަރުވެސް މިސްކިތްތަކުގެ އިތުރުން 4 ސަރަހައްދެއްގައި ބޮޑު ޖަމާއަތުގައި އީދު ނަމާދުކުރާނެއެވެ.
ބޮޑު ޖަމާއަތުގައި ނަމާދުކުރާ ތަންތަން
- މާފަންނު ސްޓޭޑިއަމް
- ވިލިމާލެ ފުޓްބޯޅަ ދަނޑު
- ހުޅުމާލެ ސިންތެޓިކް ޓްރެކް ދަނޑު
- ހުޅުމާލެ ފޭސް 2 ކްރިކެޓް ދަނޑު
މީގެއިތުރުން އިސްލާމީ މަރުކަޒާއި ސަލްމާން މިސްކިތުގައިވެސް އީދު ނަމާދުކުރާނީ ބޮޑު ޖަމާއަތުގައިކަމަށް އިސްލާމީ ކަންތައްތަކާއި ބެހޭ ވުޒާރާއިން ބުނެއެވެ.
ރާއްޖޭގައި އާއްމުކޮށް ދެ އީދު ނަމާދުކުރަމުން އަންނަނީ ހެނދުނު 07:30 ގައެވެ. އެހެންނަމަވެސް އެ ގަޑި ބަދަލުކުރުމަށް މަޝްވަރާކުރަމުން އަންނަކަމަށް އިސްލާމީ ކަންތައްތަކާއި ބެހޭ ވަޒީރު ޑރ. މުހައްމަދު ޝަހީމް އަލީ ސައީދު ވަނީ ވިދާޅުވެފައެވެ.
ވަޒީރު ވިދާޅުވީ އީދު ނަމާދު ފެށުމަށް މަޝްވަރާކުރަމުން ދަނީ ހެނދުނު 07:00 ޖަހާއިރުކަމަށެވެ. އަދި އެކަމުގައި ނިންމާގޮތް ވަރަށް އަވަހަށް އިއުލާންކުރާނެކަމަށްވެސް ޝަހީމް ވިދާޅުވިއެވެ. ކަލަންޑަރު ދައްކާގޮތުން މި އަހަރުގެ ފިތުރު އީދު ދުވަހަކީ އަންނަ މަހުގެ 10 ވަނަ ދުވަހެވެ.
