ކޮވިޑް-19 އާއިި ގުޅިގެން އެޗްޕީއޭ އިން ރޭގައި އަންގާފައިވާ އެންގުމަކުން ވަނީ މާލެ ސަރަހައްދުގައި ހަވީރު 5:00 އިން ރޭގަނޑު 08:00 އަށް އެއްގަމު އުޅަނދު ދުއްވުމާއި މަގުމައްޗަށް މީހުން ނިކުމެ އުޅުން މަނާކޮށްފައެވެ.
ގްރޭޓަރ މާލޭ ޓްރާންސްޕޯޓް ލިންކުގެ އޮފިޝަލަކު މިއަދު ވިދާޅުވީ މިނިންމުމާ ގުޅިގެން ބަހުގެ ދަތުރުތައް ކުރާ ގަޑިތަކަށް ބަދަލު ގެނައުމުގެ މަސައްކަތް ކުރަމުން އަންނަ ކަމަށެވެ. އަދި މިއަދުގެ ވަގުތެއްގައި އާ ގަޑިތައް ސޯޝަލް މީޑިޔާ މެދުވެރިކޮށް އަންގާނެކަމަށެވެ.
ހަމަމިއާއެކު މާލެ، ހުޅުލެ، ހުޅުމާލެ އަދި ވިލިނގިލިއަށް އެމްޓީސީސީ އިންކުރާ ފެރީ ދަތުރުތަކަށް ބަދަލު ގެނައުމުގެ މަސައްކަތް ކުރަމުން އަންނަ ކަމަށް އެކުންފުނިން މައުލޫމާތު ދެއެވެ.
އެމްޓީސީސީގެ ޓްރާންސްޕޯޓް ޑިޕާޓްމަންޓްގެ މެނޭޖަރު މުހައްމަދު ނާޒިމް ވިދާޅުވީ މިފެރީތަކުގެ އިތުރުން މާލެ އަތޮޅުގެ އެހެން ރަށްރަށާއި މާލެއާއި ދެމެދު ކުރާ ދަތުރުތަކަށްވެސް ބަދަލުގެންނަން ޖެހޭތީ ހުރިހާ ފެރީތަކެއްގެ ޝެޑިޔުލް ބަދަލުކުރުމަށް މަސައްކަތް ކުރަމުން އަންނަ ކަމަށެވެ. އަދި ވަރަށް އަވަހަށް މިބަދަލުތަށް އިއުލާނު ކުރާނެ ކަމަށް ނާޒިމް ވިދާޅުވިއެވެ.
