ހޮޅުދޫ ދާއިރާގެ މެންބަރު ޔޫނުސް އަލީ މި މައްސަލަ ހުށަހެޅުއްވީ އޭޕްރީލް 21ގައި ބާއްވާ މަޖިލީސް އިންތިހާބާ ދިމާކޮށް، އެ އިންތިހާބަށް ނުފޫޒު ފޯރުވަން ސަރުކާރު ކުންފުނިތަކުން ގިނަ އަދަދެއްގެ ވަޒީފާ، އެއްވެސް އުސޫލެއް ހަމައެއް ނެތި ދެމުންދާ ކަމަށް ބުނެ އެވެ.
މީގެއިތުރުން ކުއްލި މައްސަލައިގައި ބުނެފައިވަނީ ސަރުކާރުން ތާއިދުކުރާ ކެންޑިޑޭޓަށް ތާއީދުނުކުރާ މުވައްޒަފުންނަށް ފިޔަވަޅު އަޅަމުންދާ ކަމަށާއި ބައެއް މުވައްޒަފުން ވަޒީފާއިން ވަކިކޮށް، މަގާމު ބަދަލުކޮށް ވަޒީފާ އަދާކުރާތަން ބަދަލުކުރުންފަދަ ކަންކަންކުރަމުންދާ ކަމަށެވެ. މިކަންކަމަކީ އެޗްއާރްސީއެމްއިން ބަލައި ފިޔަވަޅު އަޅަންޖެހޭފަދަ އަމަލުތަކެއް ކަމަށްވެސް ބުނެފައިވެއެވެ.
އެހެންކަމުން އިންތިހާބަށް ނުފޫޒު ފޯރުވުމަށް ކުރަމުންދާ ކަންކަން ވަގުތަށް ހުއްޓާލުމަށް ކުއްލި މައްސަލައިގައި ސަރުކާރަށް ގޮވާލާފައިވެ އެވެ.
އަންނަ މަހު 21 ވަނަ ދުވަހު ބާއްވާ ރައްޔިތުންގެ މަޖިލީހުގެ އިންތިހާބުގެ ކެމްޕޭނުގެ ތެރެއިން ސަރުކާރުގެ އިސް ބޭފުޅުންނާއި އެމްޑީޕީއާ ދެމެދު އަންނަނީ ބަހުގެ ހޫނު ހަމަލާތަކެއް ބަދަލުކުރަމުންނެވެ.
