ރަސްމާލެ މަޝްރޫއު ކޮރަޕްޝަން އެންޓި ކޮރަޕްޝަން ކޮމިޝަން ( އޭސީސީން ) ނުބަލާތީ ހައިރާންވެ ކަންބޮޑުވާކަމަށް އިދިކޮޅު އެމްޑީޕީން ބުނެފި އެވެ.
Advertisement
އެ ޕާޓީން މިރޭ ބޭއްވި ނޫސްވެރިންގެ ބައަދަލުވުމުގައި ވާހަކަ ދައްކަވަމުން މަޖިލިސް އިންތިހާބުގެ ތަރުޖަމާން ކެނދިކުޅުދޫ ދާއިރާގެ މެމްބަރު އަހްމަދު އީސަ ވިދާޅުވީ ރަސްމާލެ މަޝްރޫއަކީ 70 ބިލިއަން ރުފިޔާގެ ކޮރަޕްޝަން ހިމެނޭ ޕްރޮޖެކްޓެެއްކަމަށެވެ. އަދި ރަސްމާލެ ހިއްކާ ކުންފުންޏަށް ހުޅުމާލެއިން ދިން ބިންތަކުގެ އަގު މަޝްރޫއުގެ އަގާ ނުބައްދަލު ކަމަށެވެ.
"އަޅުގަނޑުމެން އެންމެ ކުޑަ ރޭޓަށް ބެލީމާ ވެސް އެ ވިއްކާ ބިންތަކުގެ އަގު 70 ބިލިއަން ރުފިޔާ އާއި 100 ބިލިއަން ރުފިޔާ ދޭތެރޭގެ އަދަދަކަށް އަރައިގެންދޭ. އަޅުގަނޑު ދައްކާ ވާހަކައެއް ނޫން. ތިބޭފުޅުން އަމިއްލައަށް ހިސާބުތައް ހައްދަވާ ބިން ވިއްކާފައި ހުރި ރޭޓުތަކާއި ބިމުގެ ސައިޒާ ބަލާފައި. އެ އަދަދުތަކަށް ބެއްލެވީމަ 70 ބިލިއަން ރުފިޔާއަށް ވުރެ ބޮޑު އަދަދެއް ދިވެހި ދައުލަތަށް ގެއްލޭ. މިއީ 70 ބިލިއަން ރުފިޔާގެ ބޮޑު ކޮރަޕްޝަނެއް،" އީސަ ވިދާޅުވި އެވެ.
އަމިއްލަ ފަރުދަކު ހުށަނޭޅި ނަމަވެސް، ރަސްމާލޭގެ ކޮރަޕްޝަން ވާހަކަތައް ދައްކާއިރު އޭސީސީން އަމިއްލަ އަށް އިސްނަގައިގެން އެ މައްސަލަ ނުބަލާތީ ހައިރާންވެ އަޖައިބުވާ ކަމަށްވެސް އީސަ ވިދާޅުވިއެވެ.
"އަޅުގަނޑު ހަމަ އަޖައިބުވަން، ހައިރާންވަން އޭސީސީ ފަދަ ދައުލަތުގެ މިނިވަން މުއައްސަސާއަކުން، މިވަރަށް މުޅި ރާއްޖޭގެ ރައްޔިތުން އެކަމާ ކަންބޮޑުވާއިރު އެކަންކަން ބައްލަވަމުން ނުގެންދަވާތީ،" އީސަ ވިދާޅުވި އެވެ.
ރަސްމާލެ މަޝްރޫއު އޭސީސީގެ ލޮލުގައި އަޅާ ނުގަންނާތީ އެކަމުގެ ކަންބޮޑުވުން މި ސަރުކާރު ވެރިކަމަށް ގެނައުމުގައި އެންމެ އިސް ދައުރެއް އަދާކުރި ރައީސް ޔާމިންވެސް ވަނީ ރޭ ކަންބޮޑުވުން ފާޅުކޮށްފަ އެވެ.
