އައްޑޫގެ ކަރަންޓް ހާލަތު ގޯސްވެ މިމަހުގެ 11 ވަނަދުވަހުން ފެށިގެން ކޮންމެ ދުވަހަކު އެކި ސަރަހައްދުތަކުން ކަރަންޓް އަންނަނީ ކަނޑަމުންނެވެ.  

މޭޔަރު އަލީ ނިޒާރު ވިދާޅުވީ އައްޑޫ ސިޓީއަށް ދިމާވެފައިވާ ކަރަންޓްގެ މައްސަލައަށް އަވަސް ހައްލެއް ލިބޭނެކަމުގެ މާބޮޑު އުއްމީދެއް ނެތްކަމަށެވެ. އަދި މި މައްސަލަ މިހެން ދިމާވާކަން ތަކުރާރުކޮށް ފެނަކައަށް ހުށައެޅިނަމަވެސް އެތަނުގެ އެންމެ އިސްވެރިންގެ ފަރާތުން އެކަށީގެންވާ ޖަވާބެއް ނުލިބޭކަމަށްވެސް މޭޔަރު ނިޒާރު ވިދާޅުވި އެވެ. 

ފެނަކައިން ބުނެފައި އެންމެ އަވަހަށް ޖަނަރޭޓަރު ފޮނުވަން ނިންމާފައިވާ 4 ރަށުގެ ތެރޭގައި އައްޑޫ ސިޓި ހިމެނޭކަމަށެވެ. އެ ސިޓީއަށް ފޮނުވާ 1 މެގަވޮޓްގެ ޖަނަރޭޓަރު ރާއްޖެ ގެނެސް ކަސްޓަމުން ނެރުމުގެ މަސައްކަތް ކުރަމުން އަންނަކަމަށް ފެނަކައިން ވަނީ ބުނެފަ އެވެ. 

އައްޑޫ ސިޓީއަށް ކަރަންޓް ދެމުން އަންނަ ފެނަކައިން މީގެކުރިން ބުނެފައިވަނީ އެ ސިޓީން ކަރަންޓް ކަނޑަމުން އަންނަނީ ސެންޓްރަލް ޕަވަރ ޕްލާންޓްގެ 1 މެގަވޮޓްގެ ޖަނެރޭޓަރަކަށް ދިމާވި މައްސަލަ އަކާއި ގުޅިގެންކަމަށެވެ. މި ޖަނެރޭޓަރުގެ މައްސަލަ ހައްލުކުރުމުގެ އިތުރުން 2 މެގަވޮޓްގެ ޖަނަރޭޓަރެއްގެ މަރާމަތުގެ މަސައްކަތްވެސް ކުރިޔަށްދާކަމަށް ފެނަކައިން ކުރިން ވަނީ ބުނެފަ އެވެ.