އެއާޕޯޓް މަސައްކަތް ލަސްވާތީ މަގޫދޫގައި ސިލްސިލާކޮށް ކުރިއަށްދާ މި އިހުތިޖާޖުގައި ފައިމަގުންނާއި ސައިކަލުގައި އެ ރަށުގެ ގިނަ އަދަދެއްގެ ބަޔަކު ބައިވެރިވި އެވެ. މި އިހުތިޖާޖުގެ ބައިވެރިން ގޮވާލަމުން ދިޔައީ އެއާޕޯޓުގެ މަސައްކަތް އަލުން ފެށުމަށާއި ރަށްރަށުގެ މެދުގައި ތަފާތުކުރުން ނައްތާލާށެވެ.
މި މައްސަލައިގައި މަގޫދޫ ރައްޔިތުން އިހުތިޖާޖު ކުރަން ފެށީ، އެއާޕޯޓުގެ މަސައްކަތް ހުއްޓާލި ފަހުން، އެ ރަށާ ހަތް ވަރަކަށް ކިލޯމީޓަރު ދުރުމިނުގައި އޮންނަ ނިލަންދޫގައި އެއާޕޯޓެއް ތަރައްގީކުރަން ސަރުކާރުން އިއުލާންކުރުމާ ގުޅިގެންނެވެ.
އެއާޕޯޓުގެ ބޮޑު ބައެއް ނިމިފައި އޮއްވައި މަގޫދޫ އެއާޕޯޓުގެ މަސައްކަތް ކެންސަލްކޮށް ނިލަންދޫގައި އެއާޕޯޓެއް އަޅަން ނިންމި މައްސަލަ މުރާޖައު ކުރުމަށް އެދި ކުއްލި މައްސަލައެއް ހުށަހެޅުއްވީ ބިލެތްދޫ ދާއިރާގެ މެންބަރު އަހުމަދު ހަލީމް (ދޮންބިލެތް) އެވެ.
މަޖިލީހުގެ މިއަދުގެ ޖަލްސާގައި މި މައްސަލަ ހުށަހަޅަމުން ހަލީމް ވިދާޅުވީ މަގޫދޫ އެއާޕޯޓް ނިމިފައިވަނިކޮށް ހުއްޓާލާފައި ވަނީ ރައީސްގެ ބާރުތައް ގާނޫނާ ހިލާފަށް ބޭނުންކޮށް އަމިއްލަ އާއިލީ އަދި ސިޔާސީ މަންފާއަށް ކަމަށް ފެންނަން އެބަ އޮތް ކަމަށެވެ.
އެ މަޝްރޫއަކީ އާންމު މަންފާއަށްޓަކައި ދިވެހިރާއްޖޭގެ އެކި ކަންކޮޅުތަކުގައި އެއަޕޯޓް ޤާއިމުކުރުމުގެ ދަށުން ނިމިދިޔަ އެމްޑީޕީގެ ވެރިކަމުގައި ފެށުނު މަޝްރޫއެއް ކަމަށާއި އެ މަސައްކަތަކީ 231 މިލިޔަން ޑޮލަރުގެ މަޝްރޫއެއް ކަމަށް ހަލީމް ވަނީ ވިދާޅުވެފައެވެ.
ހަލީމް ވިދާޅުވި ގޮތުގައި، އެ މަޝްރޫޢު ފެށިފައި ވަނީ ނަގުދު ފައިސާ ލިބިގެންނެވެ. އަދި މި ސަރުކާރުން ވެރިކަމާ ހަވާލުވިއިރު މަސައްކަތުގެ 70 އިންސައްތަ ވަނީ ނިމިފައިވާ ކަމަށް ވިދާޅުވި އެވެ.
ހަލީމް ވިދާޅުވީ މަގޫދޫ އެއާޕޯޓުގެ މަސައްކަތް ކެންސަލް ކުރީ ކްރޮސް ސަބްސިޑީގެ އުސޫލުން 22 މިލިއަން ޑޮލަރު އެއާޕޯޓަށް ހަމަޖެހިފައި އޮއްވައި ކަމަށެވެ. ރައީސް މުއިއްޒުގެ އެ ނިންމުމަކީ ގާނޫނުއަސާސީގެ ހުދޫދުން ބޭރުން ނިންމާފައިވާ ނިންމުމެއް ކަމަށް ވެސް އޭނާ ވިދާޅުވި އެވެ.
މަޝްރޫއު ކުއްލިއަކަށް ހުއްޓާލުމަށްފަހު، އެއާޕޯޓް މަސައްކަތްކުރާ މުވައްޒަފުން ގޭގައި މަޑުކުރަން އަންގާފައިވާ ކަމަށް އެރަށުން މައުލޫމާތުދެ އެވެ. ނަމަވެސް އެ މަޝްރޫއު ހުއްޓާލަން އަންގާފައި ނުވާނެ ކަމަށް ކޮންސްޓްރަކްޝަން މިނިސްޓަރު ޑރ. އަބްދުﷲ މުއްތަލިބު ވިދާޅުވެފައިވެ އެވެ.
އަދި މަގޫދޫ އެއާޕޯޓުގެ މަސައްކަތް ހުއްޓާލި ކަމަށް ބުނާ ވާހަކަތައް މަސައްކަތުގެ ކޮންޓްރެކްޓަރ އެމްޓީސީސީން ވެސް ދޮގުކުރެ އެވެ.
މަގޫދޫގައި ތަރައްގީކުރަމުން އަންނަ އެއާޕޯޓަކީ 230 މިލިއަން ރުފިޔާ ހަރަދުކޮށްގެން ޖެޓު ޖެއްސޭ ފެންވަރަށް، ޖެޓު ކްރޫއިންނަށް ހާއްސަ ހޮޓަލަކާއި އެހެނިހެން އިންތިޒާމުތައް ހިމެނޭ އެއާޕޯޓެކެވެ.
