މަގޫދޫ އެއާޕޯޓް ހުއްޓާލާ ނިލަންދޫ އެއާޕޯޓް ގެ މަސައްކަތް ފެށި މައްސަލާގައި އެމްޑީޕީން ނެރުނު ނޫސްބަޔާނެއްގައި ބުނީ ރައީސް އިބްރާހިމް މުހައްމަދު ސާލިހްގެ ސަރުކާރުގައި 2022 ވަނަ އަހަރު ތަރައްގީކުރަން ފެށި މަގޫދޫ އެއާޕޯޓްގެ މަސައްކަޔް މި ސަރުކާރުން ހުއްޓާލީ އެ މަސައްކަތް ފަށާ އަހަރެއްހާ ދުވަހުގެ ތެރޭގައި މަސައްކަތުގެ ބޮޑުބައެއް މިދިޔަ ސަރުކާރުން ނިންމާފައިވާ ވަނިކޮށް ކަމަށެވެ. އަދި މި ސަރުކާރުން ސިޔާސީ ބޭނުމަށް ރައީސް ޑރ. މުއިއްޒުގެ ކޮއްކޯފުޅު ރައްޔިތުންގެ މަޖިލިސް އިންތިހާބު ކާމިޔާބުކުރުމަށްޓަކައި އެއްކޮށް ހުއްޓާލާފައިވާތީ އެކަމާ ނުހަނު ކަންބޮޑުވެ, އެކަން ކުށްވެރިކުރާކަމަށްވެސް އެމްޑީޕީގެ ބަޔާނުގައިވެއެވެ. 

އެމްޑީޕީން ބުނީ ފ. މަގޫދޫގައި އަޅާ އެއާޕޯޓްގެ މަސައްކަތުގެ %70 މިދިޔަ ސަރުކާރުގައި ނިންމާފައިވާކަމަށެވެ. އަދި އެއާޕޯޓްގެ ފަޔާރ ބިލްޑިންގެ މަސައްކަތް ނިމި ޕެސެންޖަރު ޓާމިލަން ސްޓްރަކްޗާގެ މަސައްކަތް ވެސް ނިންމާ ފިނިޝިންގެ މަސައްކަތްވެސް 15 ނޮވެމްބަރ 2023 ހަމަޔަށް ފަށައިފައިވާކަން އެމްޑީޕީގެ ބަޔާނުގައި ވަނީ ފާހަގަކޮށްފައެވެ. 

އެމްޑީޕީން ބުނީ މަގޫދޫ އެއާޕޯޓްގެ މަސައްކަތް ހުއްޓާލާ އަވަސްއަރުވާލައިގެން ނިލަންދޫ އެއާޕޯޓްގެ މަސައްކަތް މި ސަރުކާރުން ފެށީ އީއައިއޭގެ މަރުހަލާ ފުރިހަމަނުކޮށްކަމަށެވެ. އަދި މީ ރައީސް ޑރ. މުއިއްޒުގެ ކޮއްކޯފުޅު އަދި ޕީއެންސީގެ ކެނޑިޑޭޓު ފާތުމަތު ސައުދާއަށް އިންތިޚާބު ކާމިޔަބުކޮށްދިނުމަށް ކުރި ކަމެއްކަމަށާއި ދައުލަތުގެ ހަޒާނާއިން އިސްރާފުކުރުން މިދިޔަ 5 އަހަރު ފޮހެލާފައިވާކަމަށްވެސް އެމްޑީޕީގެ ބަޔާނުގައިވެއެވެ. 

ސަރުކާރުން ހުރިހާ އުސޫލުތަކާ ހިލާފަށް މަޝްރޫއުތައް ސިޔާސީ ބޭނުމަކަށް ބަދަލުކުރުން ވަގުތުން ހުއްޓާލުމަށާއި ފ. މަގޫދޫގެ އެއާޕޯޓު މަސައްކަތް ވަގުތުން ވަގުތަށް ފެށުމަށް އެމްޑީޕީން ވަނީ ގޮވާލާފައެވެ. އަދި ކުރިއަށް އޮތް ރައްޔިތުންގެ މަޖިލީހުގެ 20ވަނަ ދައުރުގައި މިފަދަ ތަރައްޤީގެ މަޝްރޫއުތައް މިގޮތަށް ބަދަލުކުރުމާ ހުއްޓާލުން ޤާނޫނީ ގޮތުން މެދު ނުކެނޑި ކުރިއަށް ގެންދެވޭނެ ޤާނޫނީ ހައްލެއް ހޯދައިދޭނެކަމުގެ ޔަޤީންކަން ދޭކަމަށްވެސް އެމްޑީޕީން ބުނެއެވެ.