މަޖިލިހުގެ ރައީސް މުހައްމަދު އަސްލަމް އިއްޔެ ވިދާޅުވީ މަޖިލިހުގެ ޖަލްސާތައް ދެން ކުރިއަށްގެންދާނީ އީދު ބަންދުގެ ފަހުން ކަމަށެވެ. އަދި ދެން މަޖިލިހުގެ ޖަލްސާއެއް ބާއްވާނެ ތާރީހެއް ފަހުން އަންގަވާނެ ކަމަށް އޭނާ ވިދާޅުވި އެވެ.
އަސްލަމް ވިދާޅުވި ގޮތުގައި އެއީ މަޖިލިހުން މިހާތަނަށް އަމަލުކޮށްފައިވާ ގޮތަށް ބަލައިގެން، ރަސްމީ ދުވަސްތަކުގައި ޖަލްސާ ބޭއްވުމުގެ ގޮތުން ނިންމެވި ނިންމެވުމެއް ކަމުގަ އެވެ.
މީގެއިތުރުން މަޖިލިހުގެ މުވައްޒަފުންގެ ގަވައިދުގައި ވެސް މުވައްޒަރުންގެ މަސައްކަތު ގަޑިއަކީ ސަރުކާރުގެ ރަސްމީ މަސައްކަތު ގަޑީގެ ގޮތުގައި ބަޔާންކޮށްފައިވާ ކަމަށް ވެސް އަސްލަމް ފާހަގަކުރެއްވި އެވެ.
ސަރުކާރުން ވަނީ ރޯދަ މަހުގެ ފަހު 10 އަޅުކަމަށް ހާއްސަކުރުމުގެ ގޮތުން އެ ދުވަސްތައް ބަންދު ދުވަސްތަކެއްގެ ގޮތުގައި ކަނޑައަޅާފަ އެވެ. އަދި އެ ދުވަސްތަކުގެ ބޭނުން ހެޔޮ ގޮތުގައި ހިފާ، އަޅުކަން ގިނަ ކުރުމަށް ރައީސް ޑރ. މުހައްމަދު މުއިއްޒު ވެސް ވަނީ ރައްޔިތުންނަށް އިލްތިމާސް ކުރައްވާފަ އެވެ.
