ރައީސް ޑރ. މުހައްމަދު މުއިއްޒު އެއްބައިވަންތަކަމަށް އިލްތިމާސްކުރެއްވީ އެމަނިކުފާނުގެ ރިޔާސީ ވައިދާއި އެއްގޮތަށް ފިތުރު އީދަށް މުޅި ރާއްޖެ ދިއްލާލުމުގެ ހަރަކާތް ފެށުމުގެ ގޮތުން ބޭއްވި ރަސްމިއްޔާތުގައި ވާހަކަފުޅު ދައްކަވަމުންނެވެ.
ރައީސް ވިދާޅުވީ އެމަނިކުފާނު ބޭނުންފުޅު ވަނީ އެންމެ އެކުގައި އެއް ރޫހެއްގައި މި އީދު ކުލަގަދަ ގޮތެއް ފާހަގަކުރަން ކަމަށެވެ.
ސަރުކާރުން ވަނީ އީދު ދުވަސް ފާހަގަކުރުމުގެ ގޮތުން މާލެ އާއި ބައެއް ރަށްތަކުގެ މަގުމަތީގައި ގިޑިގެ ޖަހައި ބޮކި ހަރުކޮށް، ދައުލަތުގެ އިދާރާތަކާއި ސަރުކާރު ކުންފުނިތަކުގެ އިމާރާތްތައް ވެސް ދިއްލާލާފަ އެވެ.
މި ރަސްމިއްޔާތުގެ ތެރެއިން ރައީސް ވަނީ ޖުމްހޫރީ މައިދާނުގައި ހުރި ފެންއަރުވާ ވަޑާން ވެސް އަލުން ހުޅުއްވައި ދެއްވާފަ އެވެ. މި ފެންއަރުވާ ވަޑާން އަލުން ހުޅުވީ ގިނަ ދުވަސްތަކެއް ވަންދެން ބޭނުންނުކޮށް ހުއްޓައި، މަރާމާތުކޮށްގެންނެވެ.
ކުލަ ގަދަކޮށް އީދު ފާހަގަކުރުމަކީ ރައީސް މުއިއްޒުގެ ރިޔާސީ ވައުދެކެވެ.
އެ މަނިކުފާނު ވިދާޅުވީ މި އީދު ދިވެހިން އެކުގައި، އެއް ރޫހެއްގައި، އެއް ބަޔެއްގެ ގޮތުގައި ފާހަގަކުރަން އެދިވަޑައިގަންނަވާ ކަމަށެވެ.
ރަށްރަށުގައި ވެސް ގިނަ ބަޔަކު ބޭރަށް ނުކުމެ، މުސްލިމަކަށް ވީތީ ފަހުރުވެރިކަމާ އެކީގައި އުފާ ފާޅުކުރާ އީދަކަށް މި މުނާސަބަތު ހަދައިދިނުމަށް ރައީސް މިރޭ އެދިވަޑައިގަތެވެ.
