އެވުޒާރާއިން ބުނީ އަލަށް އައިސް ޕްލާންޓްތައް ބަހައްޓާ ރަށްރަށުގައި އެކަމަށް ވާންޖެހޭ ތައްޔާރީތައް ނިމި މިހާރު ވަނީ އަމަލީ މަސައްކަތް ފެށުމަށް ތައްޔާރުވެފައިކަމަށެވެ.
އަލަށް އައިސް ޕްލާންޓްތައް ބަހައްޓާ ރަށްތައް
- ހއ.ދިއްދޫ
- ހދ.ކުޅުދުއްފުށި
- ހއ.އިހަވަންދޫ
- ށ.ފުނަދޫ
- ށ.ކޮމަންޑޫ
- ޅ.ނައިފަރު
- އއ.ރަސްދޫ
- މ.ވޭވަށް
- ދ.ބަނޑިދޫ
- ދ.މީދޫ
- ގދ.ރަތަފަންދޫ
މީގެތެރއިން އިހަވަންދޫއަކީ މިހާރުވެސް އައިސް ޕްލާންޓެއް ހުންނަ ރަށެކެވެ. އެރަށުގައި ހުރި ޕްލާންޓް މަރާމާތުކޮށް އައިސް އަލުން ދޫކުރަން މިދިޔަ ފެބްރުއަރީ 20ގައި ފެށިކަމަށް ވުޒާރާއިން ކުރިން ބުނެފައިވެއެވެ.
އަލަށް ބަހައްޓާ ޕްލާންޓްތަކުން 5 ރަށެއްގެ ޕްލާންޓަށް ފަންޑު ހަަމަޖެހިފައިވަނީ ސައުދީ ފަންޑު ފޮރ ޑިވެލޮޕްމަންޓުންކަމަށާއި އަނެއް 6 ރަށުގައި ޕްލާންޓް ޤާއިމުކުރުމަށް ހަމަޖެހިފައިވަނީ ސަރުކާރުގެ ހަރަދުގައިކަމަށް މަސްވެރިކަމާއި ބެހޭ ވުޒާރާއިން ބުނެއެވެ.
މި 11 އައިސް ޕްލާންޓް ބެހެއްޓުމުގެ މަސައްކަތްވެސް ހަވާލުކުރާނީ މޯލްޑިވްސް އިންޑަސްޓްރިއަލް ފިޝަރީޒް ކޮމްޕެނީ ލޓޑ (މިފްކޯ)އާ ކަމަށް ވުޒާރާއިން ބުނެއެވެ. ސަބަބެެއްކަމަށް ބުނީ މިފްކޯއަކީ ސަރުކާރުން މީގެ ކުރިންވެސް ހިންގާފައިވާ އައިސް ޕްލާންޓު ގާއިމްކުރުމުގެ ޕްރޮޖެކްޓުތައް ކާމިޔާބުކަމާއެކީގައި ނިންމާފައިވާ ކުންފުންޏަކަށްވާތީކަމަށެވެ.
މަސްވެރިކަމާއި ބެހޭ ވުޒާރާއިން ބުނީ މިހާރު ހުރި ބައެއް އައިސް ޕްލާންޓުތަކުން ޚިދުމަތް ދިނުމުގައި ދިމާވެފައިވާ މައްސަލަތައް ދެނެގަނެ، އެކަންކަމަށް އަވަސް ހައްލެއް ހޯދުމުގެ މަސައްކަތްތައްވެސް މިފްކޯ ގުޅިގެން ކުރަމުން އަންނަކަމަށެވެ.
މީގެ އިތުރުން ފެނަކަ ކޯޕަރޭޝަންގެ ބެލުމުގެ ދަށުން އޮަޕަރޭޓް ކުރަމުންދާ އައިސްޕްލާންޓްތައް މިފްކޯއާއި ހަވާލުކުރުމުގެ މަސައްކަތްވެސް ކުރަމުން އަންނަކަމަށް މަސްވެރިކަމާއި ބެހޭ ވުޒާރާއިން ބުނެއެވެ.
ސަރުކާރުން މިހާތަނަށް 25 ރަށެއްގައި އައިސް ޕްލާންޓުތައް ގާއިމްކޮށްފައިވާކަަމަށާއި، އިތުރު 11 އައިސް ޕްލާންޓެއް އައުމަކީ މަސްވެރިންނަށް އަމާޒުކޮށްގެން ގާއިމްކުރެވިފައިވާ އައިސް ޕްލާންޓުތަކުގެ ނެޓުވޯކުގެ ކެޕޭސިޓީ ވަރަށް ބޮޑުތަނުން އިތުރުވެގެން ދާނޭކަމެއްކަމަށް މަސްވެރިކަމާއި ކަނޑުތަކުގެ ވުޒާރާއިން ބުނެއެވެ.
