މިމަހުގެ 21 ވަނ ދުވަހު ބާއްވާ ރައްޔިތުން މަޖިލީޙުގެ އިންތިހާބުގެ ޕީއެންސީ ކެމްޕެއިން ޖަލްސާތަކުގައި ރައީސް މުއިއްޒު ގެންދަވަނީ މިހާރު އޮތް މަޖިލީހުން ސަރުކާރަށް އެއްބާރުލުން ނުދީ ޖެއްސުންކުރާކަމަށް ތަކުރާރުކޮށް ވިދާޅުވަމުންނެވެ. އަދި ޕީޢެންސީއަށް މަޖިލީހުގެ މެޖޯރިޓީ ދޭންޖެހެނީ މި ސަބަބާއި ހެދިކަމަށްވެސް ކޮންމެ ޖަލްސާއެއްގައި ހެން ރައީސް މުއިއްޒު ގެންދަވަނީ ވިދާޅުވަމުންނެވެ.
ރައީސް މުއިއްޒުގެ މިވާހަތަކަށް ފުރަތަމަ ފަހަރަށް ރައްދުދެއްވަމުން މަޖިލީހުގެ ރައީސް މުހައްމަދު އަސްލަމް ވަނީ ސަރުކާރުން އެދިގެން މަޖިލީހުން އެއްބާރުލުން ނުދިނީ ކޮންކަމެއްގައިތޯ ސުވާލު އުފައްދަވާފަ އެވެ.
އަސްލަމް ވިދާޅުވީ މަޖިލީހުގެ ދައުރު ނިންމަންޖެހޭ ދުވަސް ފަހަނަ އަޅާ ދިޔަފަހުންވެސް ސަރުކާރަށް ބަޖެޓް ފާސްކޮށްދިނުމަށް މަޖިލިސް ދަންމާލާ ޖަލްސާތައް ބާއްވާދީފައި ވާނެކަމަށެވެ. އޭގެ އިތުރުުން ރައީސް މުއިއްޒު ހުވާކުރުމުގެ ރަސްމިއްޔާތުވެސް އެމަނިކިފާނު އެދިވަޑައިގަން ގޮތަށް މަޖިލީހުން ހުރިހާ އިންތިޒާމެއް ހަމަޖައްސާ ދިންކަންވެސް އަސްލަމް ފާހަގަކުރެއްވި އެވެ.
އަސްލަމް ވިދާޅުވީ ރިޔާސީ ބަޔާން އިއްވަން އޮތް ޖަލްސާ އެމްޑީޕީގެ މެމްބަރުން ބޮއިކޮޓްކުރި ނަމަވެސް ރަައީސް މުއިއްޒުގެ ޓީމު އެދިވަޑައިގެން ގޮތަށް އެ ޖަލްސާގެވެސް ހުރިހާކަމެއް މަޖިލީހުގެ ރައީސްގެ ހައިސިއްޔަތުން އެންމެ ފުރިހަމަކޮށް ހަމަޖައްސާދިންކަމަށެވެ.
އަސްލަމް ވިދާޅުވީ މިހާރު އަމަލުކުރަމުންދާ 466 ގާނޫނުގެ ތެރެއިން 130 ގާނޫނަކީ އެމްޑީޕީގެ މެޖޯރިޓީ އޮތް އެމްޑީޕީގެ ވެރިކަމުގައި މަޖިލީހުން ފަސްކޮށްފައިވާ ގާނޫނުތައްކަމަށެވެ. އަސްލަމް ވިދާޅުވީ ކުރީ ސަރުކާރުން ހުށައަޅާފައި އޮތް 7 ބިލެއް މި ސަރުކާރުން ވެރިކަމަށް އައިސް އަންބުރާ ގެންގޮސްފައިވާކަމަށެވެ. އަދި ކުރީ ސަރުކާރުން ހުށައެޅި ބައެއް ބިލްތައް މި ސަރުކާރަށް ނުގެންދެވި ހުރީ ކޮމެޓީ މަރުހަލާގައި އޮތުމުންކަމަށްވެސް އޭނާ ވިދާޅުވި އެވެ.
އަސްލަމް ވިދަޅުވީ އިންކަމް ޓެކްސް ގާނޫނާއި މިނިވަން ވޭޖްގެ ގާނޫނުގެ ވާހަކަތައް ދައްކާތާ އެތައް ދުވަހެއްވީއިރު އެ ގާނޫނުތައް ތައްޔާރުކޮށް ފާސްކޮށްދީނީ މިދިޔަ އިބްރާހިމް މުހައްމަދު ސާލިހްގެ ވެރިކަމުގައިކަމަށެވެ. އަދި މިނިވަން މުވައްސަސާއަކަށް ސަރުކާރުން ފޮނުވި ނަމެއްވިޔަސް ފާސްކުރަުން ގެންދާކަމަށާއި މަޖިލީހުން އެއްވެސް ކަމެއް ނުހިފަހައްޓާކަމަށް އަސްލަމް ވިދާޅުވި އެވެ.
