ރައީސް ސާލިހް މިހެން ވިދާޅުވީ ރައްޔިތުން މަޖިލީހުގެ އިންތިހާބުގެ ކެމްޕެއިނަށް މިހާރު ކުރައްވާ ދަތުރުފުޅުގެ ތެރެއިން ގއ. މާމެންދޫގައި ވާހަކަ ދައްކަވަމުންނެވެ.
ރައީސް ސާލިހް ވިދާޅުވީ މި ފަދަ މުހިއްމު ވަގުތެއްގައި އެންޓި ޑިފެކްޝަން ބިލް ތަސްދީގުނުކޮށް ހިފަހެއްޓައިގެން އިންނެވުމަކީ ރައީސް މުއިއްޒު ޑިމޮކްރަސީއަށް ފާޅުގައި އަޅުއްވާ ހުރަހެއްކަމަށެވެ.
ރައްޔިތުންގެ މަޖިލީހާއި ލޯކަލް ކައުންސިލްތަކަށް މެމްބަރުން އިންތިހާބުވާ ޕާޓީ ބަދަލުކޮށްފި ނަމަ މެންބަރުކަމުން އަމިއްލައަށް އިސްތިއުފާ ދޭންޖެހޭ ގޮތަށް އެންޓި ޑިފެކްޝަން ގާނޫނުގެ ބިލް މަޖިލީހުން ފާސްކުރީ މިމަހުގެ 1 ވަނަދުވަހުއެވެ.
މި ބިލްގައިވާ ގޮތުން އެމީހަކު އިންތިހާބު ގޮނޑިއަކުން 3 ހާލަތެއްގައި އިސްތިއުފާ ދޭންޖެހެއެވެ. އެއީ އިންތިހާބުވި ޕާޓީން އަމިއްލައަށް ވަކިވުމާއި އެހެން ޕާޓީއަކަށް ބަދަލުވުމާއި އެހެން ޕާޓީއެއްގައި ދަފްތަރުވުން ނުވަތަ އަމިއްލަ ގޮތުން އިންތިހާބުވި މެންބަރަކު އެ މީހަކު އިންތިހާބުވި ދައުރުގެ ތެރޭގައި އެއްވެސް ސިޔާސީ ޕާޓީއަކާއި ގުޅުމެވެ. މި އިން އެއްވެސް ހާލަތެއް މެދުވެރިވެއްޖެނަމަ 7 ދުވަހުގެތެރޭގައި އިސްތިއުފާން ދޭންޖެހޭނެކަމަށް ބިލުގައިވެއެވެ. އެހެންނަމަވެސް އިސްތިއުފާ ނުދީފިނަމަ ދެން ހެދޭނެ ގޮތެއް ބިލޕުގައި ހިމަނާފައެއް ނުވެއެވެ.
މަޖިލީހުން ފާސްކުރިން އެންޓި ޑިފެކްޝަން ބިލަށް އުސޫލެއްގެ ގޮތުން ތާއީދުކުރައްވާކަން ރައީސް ޑރ މުއިއްޒުވެސް ވަނީ ހާމަކުރައްވާފައެވެ.
