ރައީސުލް ޖުމްހޫރިއްޔާ މިހެން ވިދާޅުވީ ރޭ ނިލަންދޫގެ ރައްޔިތުންނާއި ބައްދަލުކުރައްވައި ދެއްކެވި ވާހަކަފުޅުގަ އެވެ.
ރައީސް ވިދާޅުވީ ނިލަންދޫގެ ނަރުދަމާގެ ހުރި މައްސަލަތަކަށް ހައްލު ހޯދުމަށް މިދިޔަ ސަރުކާރުންވެސް ކޮންމެސް ވަރެއްގެ އެގްރިމެންޓްތަކެއް ހަދާފައި ވާ ކަމަށެވެ. ނަމަވެސް މިއިން ކަމެއް މިއަދާއި ހަމައަށްވެސް ހައްލުކޮށްދެވިފައި ނުވާ ކަމަށެވެ.
ރައީސް ވިދާޅުވީ އެމަނިކުފާނަކީ ވައުދުވުމަށްފަހު ރައްޔިތުންނަށް އެ ވައުދު ފުއްދަވައި ދެއްވާނެ ބޭފުޅެއް ކަމަށެވެ. އަދި ވިދާޅުވީ ނުކުރެވޭ ކަންކަން ވައުދު ނުވާނެ ކަމަށާއި، ދެފަހަރު ދެގޮތަކަށް އިތުރުފުޅު ހައްދަވައިގެން ރައްޔިތުންނަށް އޮޅުވައި ނުލައްވާނެ ކަމަށެވެ.
ރައީސް ވިދާޅުވީ އެހެން ރައްތަކުގަވެސް ފަށާފައި ނުނިމި ހުރި ކަންކަން ކުރައްވަމުން އަންނަ ކަމަށާއި، މިކަންކަން މިދިޔަ ހަތަރު މަސްދުވަހުގެ ތެރޭގައި ކުރެއްވުމުގެ މަސައްކަތް ކުރިއަށްދާ ކަމަށެވެ.
ރައީސް ވިދާޅުވީ ނިލަންދޫގެ ނަރުދަމާގެ ،މައްސަލަ ހައްލުކުރެވި މަގުހެދުމުގެ މަޝްރޫއު ފެށިގެން ކުރިއަށް ގެންދަވާނެ ކަމަށެވެ.
ރައީސް ވަނީ ނިލަންދޫގައި އެއާޕޯޓެއް އަޅުއްވައި ދެއްްވުމަށްވެސް ވައުދުވެ ވަޑައިގެންފަ އެވެ. މީގެ އިތުރުން ނިލަންދޫގައި އާބަން ސެންޓަރެއްވެސް ގާއިމުކޮށްދެއްވާނެ ކަމަށް ވަނީ ވިދާޅުވެފަ އެވެ.
ނިލަންދޫގެ ނަރުދަމާގެ މައްސަލަ ހައްލު ނުކުރެވި މަގުތަކަށް ނަޖިސް ބޭރުވުމުގެ ސަބަބުން ސިއްހީ ބޮޑޭތި މައްސަލަތައް މީގެ ކުރިން ދިމާވެފައިވާއިރު މިކަން ވަނީ މިހާރު ހިނގަމުންދާ ރައްޔިތުންގެ މަޖިލީހަށް ކުއްލި މައްސަލައެއްގެ ގޮތުގައިވެސް ހުށައަޅާފަ އެވެ.
