ކުޅުދުއްފުށިން ކަރަންޓް ކެނޑޭތާ ދެ މަހަށް ވުރެ ގިނަ ދުވަސްވެފައިވާއިރު މިއަދު ވަނީ އަނެއްކާވެސް މުޅި ރަށުން ކަރަންޓް ކެނޑިފައެވެ. ހެނދުނު 9:15 އިން ފެށިގެން މުޅި ރަށުގައި ކަރަންޓެއް ނެތެވެ.
އެރަށަށް ކަރަންޓް ދެމުން އަންނަ ފެނަކައިން ބުނީ ކަރަންޓްގެ މައްސަލަ ހައްލުކޮށް މުޅި ރަށަށް ކަރަންޓް ދެވޭނެކަމަށް ލަފާކުރެވެނީ އިރުއޮއްސި 6 ޖަހާއިރުކަމަށެވެ.
ކުޅުދުއްފުށީ ކަރަންޓެގެ މައްސަލަ ފެނަކައަށް ހައްލު ނުކުރެވި މިހާރު އެކުންފުނިން ވަނީ ސްޓެލްކޯގެ އެހީތެރިކަމަށް އެދިފައެވެ. ސްޓެލްކޯގެ މެނޭޖިން ޑިރެކްޓަރ ހުސެއިން ފަހުމީ އެކްސްގައި ކުރެއްވި ޕޯސްޓެއްގައި ވިދާޅުވީ ފެނަކައިގެ އެދުމުގެ މަތިން މިކުންފުނީގެ ގިނަދުވަސްވީ ތަޖުރިބާކާރު އިލެކްޓްރިކަލް އަދި މެކޭނިކަލް އިންޖީނިއަރުން ހިމެނޭ ޓީމެއް ދަނީ ކުޅުދުއްފުށި ސިޓީއަށް ދަތުރު ކުރަމުންދާކަމަށެވެ.
ކުޅުދުއްފުށީގައި ހުރި ޖަނެރޭޓަރު ސެޓަކަށް މައްސަލަ ދިމާވެ ކޮންމެ ދުވަހަކު އެރަށުން ދަނީ އެ ކި ހިސާބުތަކުން ގަޑިއިރަކަށް ކަރަންޓް ކަނޑަމުންނެވެ، މި ރޯދަ މަސް އެއްކޮށް އެރަށުގެ ރައްޔިތުންނަށް ކަރަންޓް ލިބެމުން ދިޔައީ މިގޮތަށެވެ.
ރޯދަމަހު އެއްކޮށް ކުޅުދުއްފުށިން ކޮންމެ ދުވަހަކު ކަރަންޓް ކަނޑަން ޖެހުމުގެ އެކަމުގެ ޒިންމާނެގުމުގެ ގޮތުން ބިލުން 50 ޕަސެންޓް ޑިސްކައުންޓް ދިނުމަށް ފެނަކައިން އިން އޮތީ ނިންމާފަ އެވެ.
