މީގެ ކުރިން މަކުނުދޫ ދާއިރާގެ މެންބަރުކަން ކުރެއްވި އަނާރާ މި ފަހަރު އަމިއްލަގޮތުން ވާދަކުރެއްވީ ހުރާ ދާއިރާއަށެެވެ. އެ ދާއިރާއަށް ވާދަކުރުމަށް އޭނާ ނިންމާފައި ވަނީ ވެރިކަން ކުރާ ޕީއެންސީގެ ޕްރައިމަރީން ނާކާމިޔާބުވުމާ ގުޅިގެންނެވެ. އަނާރާ ކުރިން މެންބަރުކަން ކުރެއްވި މަކުނުދޫ ދާއިރާއަށް މި ފަހަރު ވާދަކުރައްވާފައި ވަނީ އޭނާގެ ފިރިކަލުން އާދަމް ޝަފީގެވެ.
ވިހިވަނަ މަޖިލީހުގެ ވޯޓުގެ ވަގުތީ ނަތީޖާ ދައްކާ ގޮތުގައި މިހާތަނަށް އަނާރާއަށް ވަނީ 583 ވޯޓު ލިބިވަޑައިގެންފަ އެވެ.
ޕީއެންސީގެ ޓިކެޓުގައި ވާދަކުރެއްވި އަބްދުﷲ ވާރިސަށް މިހާތަނަށް 402 ވޯޓު ލިބިފައިވާއިރު، އެމްޑީޕީން ވާދަކުރި ޝާތިރު އަބްދުއްރަހްމާނަށް ލިބިފައި ވަނީ 283 ވޯޓެވެ. އެ ދާއިރާއަށް ޕީއެންއެފްގެ ތާއީދާ އެކު ވާދަކުރައްވާފައި ވަނީ އައިމިނަތު ރުލާ އާތިފެވެ. އޭނާއަށް މިހާތަނަށް ލިބިފައި ވަނީ 124 ވޯޓެވެ.
މަކުނުދޫ ދާއިރާއަށް ވާދަކުރެއްވި އަނާރާގެ ފިރިކަލުން އާދަމް ޝަފީގު ގޮނޑި ކާމިޔާބު ކުރައްވާފައި ވަނީ 1،000 ވޯޓުންނެވެ. އަދާލަތު ޕާޓީގެ ރައީސް އިމްރާން އަބްދުﷲ އަށް ލިބިފައިވަނީ 402 ވޯޓެވެ.
އެމްޑީޕީގެ ޓިކެޓުގައި އެ ދާއިރާއަށް ވާދަކުރެއްވި މިހާރުގެ މެންބަރު މުހައްމަދު ރާއީއަށް މިހާތަނަށް ލިބިވަޑައިގެންފައި ވަނީ 292 ވޯޓެވެ.
