މަޖިލީހުގެ އިންތިހާބުގެ ދުވަސްކޮޅެއް ކުރިން ޖަލްސާތައް މެދުކަނޑާލުމަށްފަހު މިއަދު ބޭއްވި ފުރަތަމަ ޖަލްސާގައި ސަލީމް ވިދާޅުވީ ނަފުސާނީ މައްސަލަތައް އެންމެ ބޮޑަށް ކުރިމަތިވަމުން އަންނަނީ ސަރުކާރުތައް ހިންގާ ގޮތުން ކަމަށެވެ. އެގޮތުން ސަރުކާރު ހިންގާ ގޮތުގެ ނަތީޖާއެއްގެ ގޮތުން މީހުންގެ ވިސްނުމަށް ބަދަލު އައުމާއި ނިކަމެތިކަން ރައްޔިތުންނަށް ޖެހުމާ އަދި އެ ހާލަތު މެދުވެރިވާ ގޮތްގޮތުން އެ އަސަރު ކުރިމަތިކުރުވާ ކަމަށް އޭނާ ވިދާޅުވި އެވެ.

ކޮންމެ ސަރުކާރަކުން ވެސް ވިސްނަން ޖެހޭނީ ރައްޔިތުންނާ ދޭތެރޭގައި ކަމަށް ވީނަމަވެސް ކަން ހިނގަނީ އެގޮތަށް ނޫންކަމުން ކަންތައްތައް ގޯހުން ގޯހަށްދާކަން ސަލީމް ފާހަގަކުރެއްވި އެވެ. ސަލީމް ވިދާޅުވެފައި ވަނީ ރާއްޖޭގެ ހާލަތު މަދު ބައެއްގެ އަތްމައްޗަށް ބެހިގެން ދިއުމަކީ ނިކަމެތިން ނިކަމެތިވެގެންދާ ކަމެއް ކަމަށެވެ. ވޭތުވެދިޔަ ތަނުގައި ކަންތައްތައް ހިނގާފައިވާ ގޮތުން މަޖިލިހުން އިބުރަތް ލިބިގަންނަން ޖެހޭ ކަމަށް އޭނާ ވިދާޅުވި އެވެ.

ސަލީމް ވިދާޅުވި ގޮތުގައި އާރާއި ބާރާއި ނުފޫޒަކީ އެއްވެސް ބައެއްގެ އަތްމަތީގައި އަބަދު އޮންނާނެ އެއްޗެއް ނޫން ކަމަށާއި އާރާއި ބާރު ބޭނުންކޮށްގެން ރައްޔިތުންނަށް ބިރުދައްކައި ނަފުސާނީ ގޮތުން ގެއްލުންދީ ހެދުމުން އާހިރުގައި އޭގެ އަނެއްކޮޅަށް ކަންކަން އެނބުރޭކަން ފެންނަމުންދާ ނަތީޖާތަކުން ސާފުވާ ކަމުގަ އެވެ.

ސަލީމް ވިދާޅުވީ ލިބުނު ސުޕަ މެޖޯރިޓީ އާ އެކީގައި އެއްވެސް ބަޔަކަށް ބިރުދައްކައި، އެއްވެސް ބަޔަކަށް ނަފުސާނީ ގޮތުން ގެއްލުން ނުދޭނެ ކަމަށެވެ. އަދި މަޖިލިހުގައި އޮންނަ މައިނޯރިޓީއަށް އިހުތިރާމުނުކޮށް، އެމީހުން ނަފުސާނީ ގޮތުން ބަލިކޮށްލުމަށް މަސައްކަތް ނުކުރާނެ ކަމަށް އޭނާ ވިދާޅުވި އެވެ.

ކޮންގްރެސް ޕާޓީން މަސައްކަތް ކުރާނީ ހުރިހާ ބަޔަކަށް އެއްވަރަށް ހިއްސާކޮށްގެން ކަމަށާއި ރައީސް ޑރ. މުހައްމަދު މުއިއްޒުގެ ވިސްނުންފުޅު ވެސް ހުރީ އެގޮތަށް ކަމަށް ސަލީމް ފާހަގަކުރެއްވި އެވެ.

އިލެކްޝަންސް ކޮމިޝަން (އީސީ) އިން އާންމުކުރަމުން އަންނަ ވަގުތީ ނަތީޖާތަކުން 20 ވަނަ މަޖިލިހުގެ 66 ގޮނޑި ކޮންގްރެސް ޕާޓީގެ ޓިކެޓުގައި ވާދަކުރި 66 ކެންޑިޑޭޓުން ކާމިޔާބު ކުރެއްވިއިރު، ރައީސް މުއިއްޒު ތާއީދު ކުރައްވައިގެން އިންތިހާބުގައި އަމިއްލަގޮތުން ވާދަކުރެއްވި ފަސް ކެންޑިޑޭޓަކު ވެސް ވަނީ ގޮނޑި ކަށަވަރު ކުރައްވާފަ އެވެ. މި ފަސް ކެންޑިޑޭޓުންނާ އެކު ސަރުކާރުގެ ތާއީދާ އެކު ގޮނޑި ކާމިޔާބު ކުރެއްވި ކެންޑިޑޭޓުންގެ އަދަދު 71 އަށް އަރަ އެވެ.

މަޖިލިސް އިންތިހާބުގައި އިދިކޮޅު އެންމެ ބޮޑު ޕާޓީ، އެމްޑީޕީން 93 ދާއިރާއަކަށް ވާދަކޮށް، ކާމިޔާބު ކުރެވިފައި ވަނީ 12 ގޮނޑިއެކެވެ. ހިނގަމުންމިދާ 19 ވަނަ މަޖިލިހުގައި އެމްޑީޕީން 65 ދާއިރާއެއް ކާމިޔާބުކުރި ނަމަވެސް އެތައް އަހަރެއް ވަންދެން އެ ޕާޓީ ތަމްސީލުކުރި މެންބަރުންނަށް މިފަހަރުގެ އިންތިހާބުގައި ވަނީ ނާކާމިޔާބީ އާ ކުރިމަތިލައްްވަން ޖެހިވަޑައިގެންފަ އެވެ.