ބައެއް މީހުން މަލާމާތުގެ ގޮތުން ސިޔާސީ ދާއިރާގެ "ހިސާބު ޓީޗަރު" ގެ ގޮތުގައި ސިފަ ކުރާ އަބްދުއްރަހީމް ރައްޔިތުން މަޖިލީހުގެ އިންތިހާބަށް ޖެއްސެވި ހިސާބުތައް ވެސް ވަނީ ދިމާވެފަ އެވެ. މިދިޔަ އަހަރުގެ ނޮވެމްބަރު މަހު ދެއްކެވި ވާހަކައެއްގައި އަބްދުއްރަހީމް ވަނީ މަޖިލިސް އިންތިހާބުގައި ސަރުކާރުން 70 ގޮނޑިއަށް ވުރެ ގިނައިން ނަގާނެ ކަމަށް ވިދާޅުވެފަ އެވެ.
މިިދިޔަ އާދިއްތަ ދުވަހު ބޭއްވި ރައްޔިތުން މަޖިލިހުގެ އިންތިހާބުގައި ވެރިކަން ކުރާ ޕީއެންސީން ވަނީ 66 ގޮނޑި ނަގާފަ އެވެ. އަދި އެ ޕާޓީން ތާއީދުކުރި މިނިވަން ކެންޑިޑޭޓުން ހިމަނައިގެން 71 ގޮނޑީގެ ތާއީދު ވަނީ ކޮންގްރެސް ޕާޓީއަށް ލިބިފަ އެވެ.
ދައުލަތުގެ މީޑިއާގެ ޕްރޮގްރާމެއްގައި ވާހަކަ ދައްކަވަމުން އަބްދުއްރަހީމް ވިދާޅުުވީ ސިޔާސީ މައިދާނަށް ނުކުންނަވާ މިހާތަނަށް ޖެއްސެވި އެއްވެސް ހިސާބެއް ދިމާނުވެ ނުދާ ކަމަށެވެ. އަދި އެކަން ކުރައްވަމުން ގެންދެވީ ތަޖުރިބާގެ އަލީގައި ކަމަށް އަބްދުއްރަހީމް ވިދާޅުވި އެވެ.
އަބްދުއްރަހީމް ވިދާޅުވެފައި ވަނީ ޕީޕީއެމް އުފެދުނީންސުރެއް މިހާތަނަށް ބޭއްވި ކޮންމެ އިންތިހާބެއްގައި އޭނާ ހުންނަވަނީ ގްރައުންޑްގައި ކަމަށެވެ. އަދި ވޯޓުގެ އަދަދަށް ޖެހި ހިސާބުތައް ވެސް މިހާތަނަށް ހުރީ ދިމާވެފައި ކަމަށާއި އެމްޑީޕީ ވެރިކަމުގައި ބޭއްވި 25 ބައި އިލެކްޝަނުން 22 އިލެކްޝަން ކާމިޔާބުކުރެއްވިކަން އަބްދުއްރަހީމް ފާހަގަކުރެއްވި އެވެ.
20 ވަނަ މަޖިލީހުގެ ފޮނަދޫ ދާއިރާގެ ގޮނޑި ބޮޑު ތަފާތަކުން އަބްދުއްރަހީމް ވަނީ ކާމިޔާބު ކުރައްވާފަ އެވެ. އެ އާއެކު މަޖިލީހުގެ ރައީސް ކަމަށް އޭނާ ވާދަކުރައްވާނެ ކަމަށް ދެކެވޭ ވާހަކަތަކަށްް ޖަވާބު ދެއްވަމުން އަބްދުއްރަހީމް ވިދާޅުވީ މަޖިލީހުގެ ރައީސްގެ މަގާމާ މެދު ގޮތެއް ނިންމަވާނީ ރައީސް މުއިއްޒު ކަމަށެވެ.
މަޖިލީހުގެ ރައީސްކަމަށްް އަބްދުއްރަހީމާއި ދިއްގަރު ދާއިރާގެ މެންބަރު އަހްމަދު ނާޒިމް ވެސް ވާދަކުރައްވާނެ ކަމަށްް އަޑުތައް ވަނީ ފެތުރިފަ އެވެ.
