މިއަދުގެ ހުކުރު ހުތުބާ ހާއްސަކޮށްފައިވަނީ ފަރުޟު ޒަކާތާއި އިޤްތިސާދާހުރި ގުޅުން މި މައުޟޫގެ މައްޗަށެވެ.
ހުތުބާގައި ބުނީ މުދަލު ޒަކާތް ދިނުމަކީ ދީނުގެ މަތިވެރި ރުކުނަކަށް ވީ ނަމަވެސް، އެއާމެދު ވަރަށް ގިނަ މީހުންގެ ހޭލުންތެރިކަން ކުޑަކަމަށެވެ. އެގޮތުން ރަމަޟާންމަހު ފިތުރު ޒަކާތް ދެއްކުމުން ފުދުނީކަމަށް ބައެއް މީހުން ދެކޭކަމަށެވެ. އަދި އަނެއް ބަޔަކު ދެކެނީ ބޮޑު ވިޔަފާރިވެރިއަކަށް ނުވާތީ، އޭނާ ޒަކާތް ދައްކާކަށް ނުޖެހޭނެކަމަށެވެ.
މުދަލު ޒަކާތް ދައުލަތަށް ދެއްކުމަށް ދެކޮޅު ހަދާ ބަޔަކު އުޅޭކަންވެސް ހުތުބާގައި ވަނީ ފާހަގަކޮށްފައެވެ. ފަގީރަކަށް އެ ފައިސާ ދެއްކުމުން ފުދޭނެކަމަށް އެފަދަ މީހުން ދެކުނުނަމަވެސް ދީނީ އިލްވެރިންގެ ނަޒަރުގައި އެއީ އެންމެ ރަނގަޅު ނޫން ގޮތްކަމަށް ހުތުބާގައިވެއެވެ. އަދި މުދަަލުގެ ޒަކާތް ދައްކަންޖެހޭނީ އެކަމަށް ސަރުކާރުން ކަނޑައަޅާފައި ހުންނަ އިދާރާއަށްކަމަށްވެސް ހުތުބާގައި ވަނީ ބުނެފައެވެ.
ޒަކާތް ނެރުމުން އިގްތިސާދަށް ރަނގަޅު އަސަރުކުރާނެކަން ފާހަގަކޮށް އެކަމުން އިގްތިސާދަށް އަންނާނެ ބަދަލުތައްވެސް ހުތުބާގައި ވަނީ ފާހަގަކޮށްފައެވެ. އެގޮތުން އިގްތިސާދަށް އަންނަ ލޮޅުންތަކުން ސަލާމަތްކޮށްދީ އިގްތިސާދު ހަމައަކަށް އަޅުވާ ދޭނެކަމަށްވެސް ހުތުބާގައިވެއެވެ.
ޒަކާތް ނެގުމާއި ބެހުމުގެ ހަރުދަނާ ނިޒާމެއް ދައުލަތުން ހަމަޖައްސަވާފައިވާއިރު، ޒަކާތް ދެއްކުމުގެ ޝަރުތުތައް ފުރިހަމަވާ އެންމެހައި ފަރާތްތަކަށް ޒަކާތް ދެއްކުމަށް ހުތުބާގައިވަނީ ގޮވާލާފައެވެ. އަދި ޒަކާތާބެހޭ ޝަރުއީ އަދި އިދާރީކަންކަން އޮޅުން ފިލުވައި ނަފުސު ހޭލުންތެރިކުރުވުމަށްވެސް ހުތުބާގައި ވަނީ ގޮވާލާފައެވެ.
