ރައީސް އޮފީހުގައި މިހާރު ކުރިއަށްދާ ނޫސްވެރިންގެ ބައްދަލުވުމުގައި ފަހުމީ ވިދާޅުވީ ކަރަންޓު ބިލު ބޮޑުވުމުގެ ކަންބޮޑުވުން ރައްޔިތުންގެ އެބަހުރި ކަމަށާއި ކަރަންޓު ބިލު ބޮޑުވުމުގެ މައްސަލައަކީ ހަމައެކަނި ރާއްޖެއަށް ދިމާވެގެން އުޅޭ މައްސަލައެއް ނޫން ކަމަށެވެ. މޫސުމަށް އަންނަ ބަދަލުތަކާ ގުޅިގެން ދުނިޔޭގެ އެހެން ސަރަހައްދުތަކުގެ ކަރަންޓު ބިލަށް ވެސް ބަދަލު އަންނަމުންދާ ކަމަށް ފަހުމީ ވިދާޅުވި އެވެ.
ފަހުމީ ވިދާޅުވެފައި ވަނީ ރޯދަ މަހަކީ ހަރަދު ބޮޑު މަހަކަށް ވާތީ އާއި އެ މަހު ކުރާ ހަރަދަށް ލުޔެއް ދިނުމުގެ ގޮތުން ރައީސް ޑރ. މުހައްމަދު މުއިއްޒު ނިންމެވި ގޮތަށް އެ ކުންފުނިން ޑޮމެސްޓިކް ކޮންސިއުމަރުންނަށް ފޮނުވި ބިލުތަކަށް ޑިސްކައުންޓް ދީފައިވާ ކަމަށެވެ. ޖުމްލަ ގޮތެއްގައި ރައީސް ނިންމެވި ނިންމެވުމާ އެއްގޮތަށް ޑިސްކައުންޓު ދެވިފައިވާކަން އޭނާ ފާހަގަކުރެއްވި އެވެ.
ރޯދަ މަހުގެ ޕީކާއި އެހެން މަސްތަކުގެ ޕީކް ތަފާތުކަން ފާހަގަކުރައްވާ ފަހުމީ ވިދާޅުވި ގޮތުގައި އެހެން މަސްތަކުގައި ޕީކް އުޅެނީ ޖުމްލަ ގޮތެއްގައި މެންދުރު 12:00 އިން ފެށިގެން މެންދުރުފަހު 2:00 ނުވަތަ 3:00 އާ ދޭތެރޭގަ އާއި ރޭގަނޑުގެ ވަގުތެއްގައި ކަމުގަ އެވެ. އެހެންނަމަވެސް ރޯދަ މަހުގެ ޕީކް އުޅެނީ ހަވީރު 4:00 އިން ފެށިގެން 6:00 އާ ދޭތެރޭގައި ކަމަށް ފަހުމީ ވިދާޅުވި އެވެ. އޭނާ ވިދާޅުވީ ކަރަންޓު ބޭނުންކުރާ މިންވަރަށް ބަލާއިރު އެ ކުންފުނިން ބިލު ކޮށްފައި ހުރީ ރަނގަޅަށް ކަމަށެވެ.
ބިލިން ސައިކަލް ހުންނަ ގޮތުން މާލޭގެ 48،000 ކޮންސިއުމަރުންނަށް ރޯދަ މަސް ފެށޭ ދުވަހު ރީޑިން ނަގާފައި މަސް ނިމޭ ދުވަހު ރީޑިން ނެގުމަކީ ފަސޭހަކަމެއް ނޫން ކަމަށް ފަހުމީ ވިދާޅުވި އެވެ. އޭނާ ވިދާޅުވެފައި ވަނީ މީހުންނަށް މުސާރަ ލިބޭ ގޮތުންނާއި ދިރިއުޅުމުގެ ކަންކަން ހުންނަ ގޮތުން ބިލު ނަގާ ގޮތަށް ބަދަލު ގެނެސްފި ނަމަ ގޮންޖެހުންތައް ހުންނާނެ ކަމަށެވެ.
ފަހުމީ ވަނީ ކަރަންޓު ބިލަށް އަންނަމުންދާ ބަދަލުތަކާ ގުޅޭގޮތުން ހޭލުންތެރިކުރުމުގެ ޕްރޮގްރާމުތައް ހިންގަން ޖެހޭ ކަމަށާއި ކަރަންޓު ބިލު ކުޑަކުރެވޭނީ ކަރަންޓު އިގުތިސޯދު ކޮށްގެން ކަމުގައި ފާހަގަކުރައްވާފަ އެވެ.
