ރައީސް އޮފީހުގައި މިއަދު ބޭއްވި ނޫސްވެރިންގެ ބައްދަލުވުމުގައި ސްޓެލްކޯގެ މެނޭޖިން ޑިރެކްޓަރު ހުސައިން ފަހުމީ އާއި ފެނަކައިގެ މެނޭޖިން ޑިރެކްޓަރު މުއާޒު މުހައްމަދު ރަޝީދު ވަނީ ރޯދަ މަހުގެ ބިލަށް ދީފައިވާ ޑިސްކައުންޓުގެ ތަފުސީލު ހިއްސާކުރައްވާފަ އެވެ.
ފަހުމީ ވިދާޅުވީ ރޯދަ މަހަކީ ހަރަދު ބޮޑު މަހަކަށް ވާތީ އާއި އެ މަހު ކުރާ ހަރަދަށް ލުޔެއް ދިނުމުގެ ގޮތުން ރައީސް ޑރ. މުހައްމަދު މުއިއްޒު ނިންމެވި ގޮތަށް އެ ކުންފުނިން ޑޮމެސްޓިކް ކޮންސިއުމަރުންނަށް ފޮނުވި ބިލުތަކަށް ޑިސްކައުންޓް ދީފައިވާ ކަމަށެވެ. ޖުމްލަ ގޮތެއްގައި ރައީސް ނިންމެވި ނިންމެވުމާ އެއްގޮތަށް ހުރިހާ ޑޮމެސްޓިކް ކޮންސިއުމަރުންނަށާއި އަލަށް ކަރަންޓުލާފައިވާ ގޭބިސީތަކަށް ވެސް ޑިސްކައުންޓު ދެވިފައިވާކަން އޭނާ ފާހަގަކުރެއްވި އެވެ.
ފަހުމީ ވިދާޅުވެފައި ވަނީ ބައެއް ކޮންސިއުމަރުންނަށް ބިލު ކުރެވުނުއިރު ރޯދަ މަހު ކުޑަވާ ގޮތަށް ބިލު ކުރެވުނު ނަމަވެސް ގިނަ ކޮންސިއުމަރުންނަށް ބިލު ކުރެވިފައި ވަނީ ރަނގަޅަށް ކަމަށެވެ.
"ބިލިން ސައިކަލް" ހުންނަ ގޮތުން މާލޭގެ 48،000 ކޮންސިއުމަރުންނަށް ރޯދަ މަސް ފެށޭ ދުވަހު ރީޑިން ނަގާފައި މަސް ނިމޭ ދުވަހު ރީޑިން ނެގުމަކީ ފަސޭހަކަމެއް ނޫން ކަމަށް ފަހުމީ ވިދާޅުވި އެވެ. އޭނާ ވިދާޅުވި ގޮތުގައި މީހުންނަށް މުސާރަ ލިބޭ ގޮތުންނާއި ދިރިއުޅުމުގެ ކަންކަން ހުންނަ ގޮތުން ބިލު ނަގާ ގޮތަށް ބަދަލު ގެނެސްފި ނަމަ ގޮންޖެހުންތައް ހުންނާނެ ކަމުގަ އެވެ.
ފެނަކައިގެ އެމްޑީ މުއާޒު: ވިދާޅުވީ ރޯދަ މަހު އެ ކުންފުނިން ޑިސްކައުންޓުގެ ގޮތުގައި 25 މިލިއަން ރުފިޔާ ދިން ކަމަށް - ފޮޓޯ:ރައީސް އޮފީސް
މި ބައްދަލުވުމުގައި މުއާޒު ވިދާޅުވީ ރައީސް މުއިއްޒުގެ ވައުދުފުޅާ އެއްގޮތަށް ފެނަކައިން ރޯދަ މަހުގެ ބިލުން ޑިސްކައުންޓުގެ ގޮތުގައި 25 މިލިއަން ރުފިޔާ ދީފައިވާ ކަމަށެވެ. ރޯދަ މަހުގެ ބިލުގައި ދެ "ބިލިން ސައިކަލް" އެއް ހިމެނޭކަން ފާހަގަކުރައްވާ މުއާޒު ވިދާޅުވެފައި ވަނީ އާންމު ގޮތެއްގައި ފެނަކައިން ބިލު ކުރަމުން އަންނަނީ މަހުގެ 25 ފެށިގެން ޖެހިގެން އަންނަ މަހުގެ 24 ވަނަ ދުވަހަށް ކަމަށެވެ. އެހެންކަމުން ފުރަތަމަ ބިލުގައި ހިމެނޭ ރޯދަ މަހުގެ ކުރީގެ ދުވަސްތަކަށް ޑިސްކައުންޓު ދެވުނުކަން މުއާޒު ފާހަގަކުރެއްވި އެވެ.
ކުރީ ބިލުތަކުން ޑިސްކައުންޓު ނުލިބޭ ފަރާތްތަކަށް ވެސް ދެވަނަ "ބިލިން ސައިކަލް" އިން ޑިސްކައުންޓު ލިބޭނެކަން ފާހަގަކުރައްވާ މުއާޒު ވިދާޅުވެފައި ވަނީ އެ ކެޓަގެރީތަކުގައި ނުހިމެނޭ ފަރާތެއް ހުރި ނަމަ، އެ ފަރާތަކަށް މި މަހު ކުރާ ބިލުގައި 10 އިންސައްތައިގެ ޑިސްކައުންޓެއް ހިމެނިފައިވާނެ ކަމަށެވެ.
