ރައީސް އޮފީހުގައި އާދިއްތަ ދުވަހު ބޭއްވި ނޫސްވެރިންގެ ބައްދަލުވުމުގައި ކަރަންޓު ބިލު ބޮޑުވާ މައްސަލައާ ގުޅޭގޮތުން މައުލޫމާތު ދެއްވަމުން މުއާޒު ވިދާޅުވީ ގޭބީސީތަކުގެ ކަރަންޓު ބިލު ކުޑަކުރުމަށް އެހީތެރިވުމުގެ ގޮތުން އެ ކުންފުނިން މިހާރު ސްމާޓް މީޓަރު ތައާރަފު ކުރުމުގެ ޕްރޮޖެކްޓެއް ފަށައިގެން ކުރިއަށްދާ ކަމަށެވެ. ސްމާޓް މީޓަރާ އެކު ކޮންމެ ދުވަހަކު ވެސް ކަރަންޓު ހޭދަކުރެވޭ މިންވަރު އެނގި، ބިލު ކުޑަކުރަން އެހީއަކަށް ވާނެ ކަމަށް މުއާޒު ވިދާޅުވި އެވެ.

މުއާޒު ވިދާޅުވެފައި ވަނީ، ސްމާޓް މީޓަ ޕްރޮޖެކްޓް އެންމެ ފުރަތަމަ ފެށުމަށް ހަމަޖެހިފައި ވަނީ ދ. ކުޑަހުވަދޫގައި ކަމަށެވެ. އެ ރަށުގައި މި ޕްރޮޖެކްޓު ފެށުމަށް ވާން ޖެހޭ ތައްޔާރީތައް ފެނަކައިން ވެފައިވާ ކަމަށް އޭނާ ވިދާޅުވި އެވެ. ކުޑަހުވަދޫގެ ކަސްޓަމަރުންނަށް ކުރިއަސް އޮތްތަނުގައި ސްމާޓް މީޓަރުގެ މެދުވެރިކޮށް ކޮންމެ ދުވަހަކު ބިލަށް އަރާވަރު ބަލާލެވޭނެ ކަމަށް މުއާޒު ފާހަގަކުރެއްވި އެވެ.

އެ ބައްދަލުވުމުގައި މުއާޒު ވިދާޅުވި ގޮތުގައި ފެނަކައިން ކަރަންޓުގެ ހިދުމަތް ފޯރުކޮށްދެމުން އަންނަ ރަށްރަށުން ކަރަންޓު ބިލު ބޮޑުވުމުގެ ޝަކުވާ އެ ކުންފުންޏަށް ލިބެމުންދާ ކަމުގަ އެވެ. އެގޮތުން އެކަން އެންމެ ބޮޑަށް ފާހަގަކުރެވިފައި ވަނީ ރޯދަ މަހަށް ފަހުގައި ކުރެވުނު ބިލުން ކަމަށް މުއާޒު ވިދާޅުވި އެވެ.

މުއާޒު ވިދާޅުވީ އެކަމާ ގުޅިގެން ރީޑިން ނެގުމުގައި މައްސަލައެއް އުޅޭތޯ އާއި ބިލު ކުރަމުން ދަނީ ޔޫއާރުއޯއިން ކަނޑައަޅާފައި މިންގަނޑުތަކަށްތޯ ބެލި ކަމަށާއި އެ ކުންފުނިން ބެލިބެލުމުން ބިލުގެ މަސައްކަތް ކުރެވިފައި ވަނީ ރަނގަޅަށް ކަމަށް އެނގިފައިވާ ކަމަށެވެ. ރޯދަ މަހާ ގުޅިގެން ކަރަންޓު ބޭނުންކުރާ މިންވަރު ވަރަށް ބޮޑަށް އިތުރުވި ކަމަށް މުއާޒު ވިދާޅުވި އެވެ. އޭނާ ވިދާޅުވެފައި ވަނީ އެކަން އެގޮތަށް ވެފައި ވަނީ ރޯދަ މަހާއި ހޫނު މޫސުމާ ދިމާވުމުން ކަމަށް ފާހަގަކުރެވިފައިވާ ކަމަށެވެ.

ރައީސް ޑރ. މުހައްމަދު މުއިއްޒުގެ ވައުދުފުޅާ އެއްގޮތަށް ފެނަކައިން ރޯދަ މަހުގެ ބިލުން ޑިސްކައުންޓުގެ ގޮތުގައި 25 މިލިއަން ރުފިޔާ ދީފައިވާ ކަމަށް މުއާޒު ވިދާޅުވި އެވެ.

ރޯދަ މަހުގެ ބިލުގައި ދެ "ބިލިން ސައިކަލް" އެއް ހިމެނޭކަން ފާހަގަކުރައްވާ މުއާޒު ވިދާޅުވި ގޮތުގައި އާންމު ގޮތެއްގައި ފެނަކައިން ބިލު ކުރަމުން އަންނަނީ މަހުގެ 25 ފެށިގެން ޖެހިގެން އަންނަ މަހުގެ 24 ވަނަ ދުވަހަށް ކަމުގަ އެވެ. އެހެންކަމުން ފުރަތަމަ ބިލުގައި ހިމެނޭ ރޯދަ މަހުގެ ކުރީގެ ދުވަސްތަކަށް ޑިސްކައުންޓު ދެވުނުކަން މުއާޒު ފާހަގަކުރެއްވި އެވެ.

މުއާޒު ވިދާޅުވީ ކުރީ ބިލުތަކުން ޑިސްކައުންޓު ނުލިބޭ ފަރާތްތަކަށް ވެސް ދެވަނަ "ބިލިން ސައިކަލް" އިން ޑިސްކައުންޓު ލިބޭނެ ކަމަށާއި އެ ކެޓަގެރީތަކުގައި ނުހިމެނޭ ފަރާތެއް ހުރި ނަމަ، އެ ފަރާތަކަށް މި މަހު ކުރާ ބިލުގައި 10 އިންސައްތައިގެ ޑިސްކައުންޓެއް ހިމެނިފައިވާނެ ކަމަށެވެ. "އެއްވެސް ހާލެއްގައި، ޑިސްކައުންޓު ނުލިބޭ އެއްވެސް މީޓަރެއް ހިމެނިފައެއް ނުވާނެ،" އޭނާ ވިދާޅުވި އެވެ.