ވަޒީރުންނާއި ސުވާލުކުރުމަށް ކުރިޔަށް ގެންދާ "އަހާ" ފޯރަމްގައި އާއްމު ރައްޔިތަކު ކުރު ސުވާލަކަށް ޖަވާބުދެއްވަުން ވަޒީރު އަލީ އިހްސާން ވިދާޅުވީ ރާއްޖޭގައި އުޅެނީ ކިހާ ބިދޭސީންނެއްކަމެއް ކޮން ބައެއް ކަމެއް އަދި ކިހާ ބައެއް ކަން ކަނޑައެޅިގެން މިހާތަނަށް އަދި ހޯދިފައިނުވާކަމަށެވެ.
ބިދޭސީންގެ މައްސަލަ ހައްލުކުރުުގެ މަސައްކަތް ފަށާފައިވާ ކަމަށާއި ފުރަތަމަ ކުރާ މަސައްކަތަކީ ރާއްޖޭގައި އުޅޭ ހުރިހާ ބިދޭސީންގެ އިނގިލީގެ ނިޝާބްތައް ނެގުންކަމަށެވެ. އަދި މި މަސައްކަތް އަންނަ ބުރާސްފަތި ދުވަހު ހިންމަފުށީގައި ފަށާ އެއް އަހަރު ދުވަހުގެ ތެރޭގައި މި މަސައްކަތް ނިންމާނެކަމަށްވެސް ވަޒީރު އިހްސާން ވިދާޅުވިއެވެ.
ގަވައިދާ ހިލާފަށް އުޅޭ ބިދޭސީން ހޯދުމަށް ހިންގި އޮޕަރޭޝަނެއްގެ ތެރެއިން
ބިދޭސީން ގަވައިދަށް ފެއްތުމަށް މަސައްކަތް އަންނަ ބުރާސްފަތި ދުވަހު ފަށާއިރު އެ މަސައްކަތް އެއްފަހަރާ ރާއްޖޭގެ ހުރިހާ ރަށެއްގައި މަހެއްހާ ދުވަހުގެ ތެރޭގައި ފަށާނެކަމަށާއި އެ މަސައްކަތް ކުރިޔަށް ގެންދާނީ ފުލުހުންނާއި ކައުންސިލްތަކާއި ގުޅިގެންކަމަށް އިހްސާން ވިދާޅުވިއެވެ.
ބިދޭސީންގެ އިނގިލީގެ ނިޝާން ނެގުމަށްފަހު ގަވައިދާ ހިލާފަށް އުޅޭ ބިދޭސީން ގަވައިދަށް ފެއްތުމަށް ފަސޭހަ އިންތިޒާމުތަކެެއް ހަމަޖައްސަވާނެކަމަށް އިހްސާން ވިދާޅުވިއެވެ. އަދި އެއްވެސް އައިޑެންޓީއެއް ނެތް މީހުން އެމީހުންގެ ގައުމަތަކާއި ގުޅި ޓްރެވަލް ޑޮކިއުމެންޓް ހަދާ އެމީހުން ފޮނުވާލާނެކަމަށް ވަޒީރު އިހްސާން ވިދާޅުވިއެވެ. މި މަސައްކަތް 3 އަހަރުގެ ތެރޭގައި ނިންމާލަން މިހާރު ޓައިމް ލައިން ކަނޑައަޅާފައިވާކަމަށް އިހްސާން ވިދާޅުވިއެވެ.
