ރައީސް އޮފީހާއި ޕަބްލިކް ސާވިސް މީޑިއާ (ޕީއެސްއެމް) ގުޅިގެން ކުރިއަށް ގެންދާ އަހާ ސިލްސިލާގެ ތިންވަނަ ފޯރަމުގައި މިރޭ ވާހަކަ ދައްކަވަމުން އަމީން ވިދާޅުވީ މޯލްޑިވިއަންގެ ވައިޑް-ބޮޑީ އެއާކްރާފްޓް އޮޕަރޭޝަންތައް ފެށުމުގައި ވަރަށް ބޮޑެތި ކުރިއެރުންތައް ލިބިފައިވާ ކަމަށެވެ. އެހެންނަމަވެސް، އެ އެއާކްރާފްޓުތައް ގަތުމަށް ފަހު ރާއްޖެއަށް ރަޖިސްޓްރީ ބަދަލު ކުރުމަކީ ވަގުތު ނަގާ ކަމެއް ކަމަށް އަމީން ފާހަގަކުރެއްވި އެވެ.
މި އެޑްމިނިސްޓްރޭޝަނުގެ ފުރަތަމަ 100 ދުވަހުގެ ތެރޭގައި މޯލްޑިވިއަންގެ އޮޕަރޭޝަނަށް ވައިޑް-ބޮޑީ އެއާކްރާފްޓް ތައާރަފު ކުރުމަކީ ރައީސް ޑރ. މުހައްމަދު މުއިއްޒުގެ ވައުދަކަށްވާއިރު، ރާއްޖެއަށް ފަތުރުވެރިން ގެނެވޭނެ މަންޒިލުތަކަށް ދަތުރުތައް ފުޅާކުރުމަށް ގައުމީ އެއާލައިންއަށް ވައިޑް-ބޮޑީ ދެ ބޯޓު ގެނައުމަށް ސަރުކާރުން އެހީވާ ގޮތަށް ކެބިނެޓުން ވަނީ ނިންމާފަ އެވެ.
