ރައްޔިތުންގެ މަޖިލިހުގެ މިއަދުގެ ޖަލްސާގައި، ހޯރަފުށީ ދާއިރާގެ މެންބަރު އަހުމަދު ސަލީމް ކުރެއްވި ސުވާލަށް ޖަވާބު ދެއްވަމުން ހަލީލް ވިދާޅުވީ، ސަރުކާރުގެ މައި ހޮސްޕިޓަލަށް އޮތް ޑިމާންޑު ކުޑަ ކުރަން އެކި މަސައްކަތްތައް ކުރަމުންދާ ކަމަށެވެ. އެގޮތުން އަތޮޅު ހޮސްޕިޓަލްތަކާ އަދި ރީޖަނަލް ހޮސްޕިޓަލުތަކުގެ ފެންވަރު ރަނގަޅުކޮށް، އާ ހިދުމަތްތައް ފެށުމަށް މަސައްކަތް ކުރަމުން އަންނަކަން ހަލީލް ފާހަގަކުރެއްވި އެވެ.
ހަލީލް ވިދާޅުވެފައި ވަނީ ރީޖަނަލް ހޮސްޕިޓަލުތަކުގައި އެމްއާރުއައި، ސީޓީ ސްކޭންގެ އިތުރުން ޑައިލިސިސްގެ ހިދުމަތް ހުރިހާ އަތޮޅަކަށް ފުޅާކުރާނެ ކަމަށެވެ.
ހަލީލް ވިދާޅުވި ގޮތުގައި އަތޮޅު ހޮސްޕިޓަލުތަކާ އަދި ރީޖަނަލް ހޮސްޕިޓަލުތަކަށް ގެނެވޭ މި ބަދަލުތަކާ އެކު، ރަށްރަށުން ފަރުވާއަށް އައިޖީއެމްއެޗަށް އަންނަ މީހުންގެ އަދަދު މަދުކުރެވޭނެ ކަމުގަ އެވެ.
މާލެ ސަރަހައްދުން އައިޖީއެމްއެޗާއި ހުޅުމާލެ ހޮސްޕިޓަލާއި ވިލިމާލެ ހޮސްޕިޓަލުގައި ޑައިލިސިސްގެ ފަރުވާ ދެމުން އަންނައިރު، ގިނަ ރީޖަނަލް ހޮސްޕިޓަލުތަކުންނާއި ފުވައްމުލަކާ އަދި އައްޑޫ އިކުއިޓޯރިއަލް ހޮސްޕިޓަލުން ޑައިލިސިސްގެ ހިދުމަތްދެ އެވެ. މީގެ ދޮޅު އަހަރު ކުރިން ބ. އޭދަފުށީގައި ހުންނަ އަތޮޅު ހޮސްޕިޓަލާއި ޅ. ނައިފަރުގައި ހުންނަ އަތޮޅު ހޮސްޕިޓަލުގައި ޑައިލިސިސްގެ ހިދުމަތް ވަނީ ފަށާފަ އެވެ.
