"ސީއެންއެމް" އިން ކުރި ސުވާލަކަށް ޖަވާބުދެއްވަމުން އާޒިމް ވިދާޅުވީ މާފަންނު އާސަހަރާ މިސްކިތުގެ ސްޓަރަކްޗާ މަސައްކަތް މީހާރު ހުރީ ގާތްގަނޑަކަށް އެއްކޮށް ނިމިފައިކަމަށެވެ. އަދި ފިނިޝިން މަސައްކަތްތަށްވެސް ވަރަށް އަވަހަށް ނިންމުމަށް ބަޔަކާ ހަވާލުކުރާނެކަމަށް ފާހަގަކޮށް އާޒިމް ވިދާޅުވީ އެކަމަށް ބޭނުންވާ މަސައްކަތް މިހާރު ކުރަމުން އަންނަ ކަމަށެވެ.
އާޒިމް އިތުރަށް ވިދާޅުވީ އާސަހަރާ މިސްކިތުގެ މަސައްކަތްތައް އެެއްކޮށް ނިމުނީމާ ވީހާވެސް އަވަަހަށް ވަޅުލުމުގެ މަސައްކަތްވެސް ރަަނގަޅު ބަޔަަކަށް ހަވާލުކޮށްގެން، އެ މަސައްކަތްވެސް ކުރިއަށް ގެންދާނެކަމަށެވެ.
މާލޭ ސިޓީ ކައުންސިލުން ވަނީ މީގެ ކުރިން މިނިމުނު ރޯދަ މަސް ފެށުމުގެ ކުރިން އާސަހަރާ މިސްކިތުގެ މަސައްކަތް ނިންމުމަށް މަސައްކަތްކޮށްފައެވެ. 4.6 މިލިއަން ރުފިޔާ އަށް ސިޓީ ކައުންސިލުން އާސަހަރާ މިސްކިތުގެ މަޝްރޫއު ހަވާލުކޮށްފައި ވަނީ ބީސިކްސް އިންވެސްޓްމަންޓަށެވެ.
މާލޭ ސިޓީ ކައުންސިލްގެ ހަތަރުވަނަ ދައުރުގެ 99 ވަނަ ރަސްމީ އާންމު ޖަލްސާގައި ކައުންސިލުން ނިންމާފައިވަނީ ޒަމާން ތަކަކަށްފަހު އާސަހަރާ ތަރައްގީކުރުމަށް މަޝްރޫއުގެ ދަށުން އިމާރާތަށް ގެންނަންޖެހޭ ބަދަލުތައް ގެނައުމަށްޓަކައި ކުރަންޖޭހޭ މަސައްކަތްތައް 27 މެއި 2023 އިން ފެށިގެން މާލެ ސިޓީ ކައުންސިލުން ކުރިއަށް ގެންދިއުމަށެވެ.
އާ ސަހަރާ އަށް ބޮޑެތި ބަދަލުތަކެއް ގެންނަން ނިންމާފައިވާތީ 27 މެއި 2023 އިން ފެށިގެން ނިޔާވާމީހުންގެ ކަށުކަމާކެމީގެ ކަންކަން ހުޅުމާލޭ ސަހަރާއިން ކުރާ ގޮތަށް މާލޭ ސިޓީ ކައުންސިލުން ވަނީ ނިންމާފަ އެވެ.
