އެމިރޭޓްސް އެއާލައިނަށް ބައެއް ގައުމުތަކަށް ޕަސެންޖަރުން އުފުލުމުގެ ހުއްދަ ޔޫއޭއީ އިން ދީފި ކަމަށް އެ ކުންފުނީގެ ޗެއާމަން އަހްމަދު ބިން ސައީދު ވަނީ ޓްވީޓް ކުރައްވާފަ އެވެ.
އެންމެ ފުރަތަމަ ފްލައިޓް ފުރާނީ ޔޫއޭއިން ކަމަށާއި ލަންޑަން، ފްރޭންކްފާޓް، ޒޫރިޗް އަދި ޕެރިސް އަށް ދަތުރުތައް އަލުން ފަށާނެކަމަށް ޗެއާމަން ވިދާޅުވި އެވެ.
ޔޫއޭއީ ސަރުކާރުން ވަނީ ކޮރޯނާވައިރަސް ފެތުރުން ހުއްޓުވުމަށް މާޗް 25 ވަނަ ދުވަހުން ފެށިގެން އެގައުމުން އެއްވެސް ފްލައިޓެއް ފުރުން އަދި ގައުމަށް އެއްވެސް ފްލައިޓެއް އައުން މަނާކޮށްފަ އެވެ.
މީގެ އިތުރުން، އެމިރޭޓްސް ސްކައިކާގޯ އިން ވަނީ ބުދަ ދުވަހު އެގައުމަށް ކާބޯތަކެއްޗާއި ބޭސް ގެނައުމުގެ މަސައްކަތް ސަރުކާރުގެ އިރުޝާދާއެއް ގޮތަށް ކުރަން ފަށާފަ އެވެ. އެ ކުންފުނިން ވަނީ ޖެނުއަރީ މަހުގެ މެދުތެރެއިން މާޗް މަހުގެ މެދަށް 225،00 ޓަނު ކާގޯ އުފުލާފައެވެ. އޭގެތެރެއިން 55،000 ޓަނަކީ ކާބޯތަކެއްޗެވެ.
ޔޫއޭއީ އިން ވަނީ ރޭގަނޑު 08:00 އިން ހެނދުނު 06:00 އަށް އެގައުމުގައި ކާފިއު އިއުލާނު ކޮށްފައެވެ. އެގައުމުގައި މިހާތަނަށް 814 މީހުން ކޮވިޑް-19 އަށް ޕޮޒިޓިވް ވެފައި ވާއިރު އެބަލީގައި އަށް މީހަކު ވަނީ މަރުވެފަ އެވެ.
