ބައިނަލްއަގުވާމީ މަސައްކަތްތެރިންގެ ދުވަހުގެ މުނާސަބަތުގައި ދެއްވި ހިތާބުގައި މާރިޔާ ވިދާޅުވީ، މަސައްކަތުގެ މާހައުލުގެ ރައްކާތެރިކަމާއި ސިއްހަތު ކަށަވަރު ކުރުމަށް މިދިޔަ 15 އަހަރު ކުރިއެރުންތަކެއް ލިބިފައިވާ ކަމަށެވެ.
ގާނޫނީ އޮނިގަނޑުގެ ތެރެއިން މަސައްކަތުގެ މާހައުލުގެ ރައްކާތެރިކަމާއި ސިއްހަތު ކަށަވަރު ކުރުމުގެ ހައްގު މިހާރު ލިބިފައިވާ ކަމަށާއި ގާނޫނުގެ ފޮނިމީރުކަން ދިވެހި މަސައްކަތްތެރިންނަށް ވަރަށް އަވަހަށް ލިބޭނެ ކަމަށް މާރިޔާ ވިދާޅުވި އެވެ.
މާރިޔާ ވިދާޅުވެފައި ވަނީ އަބުރުވެރި ވަޒީފާއެއް ހޯދުމުގެ ފުރުސަތު ހިމެނޭ ގޮތަށް މަސައްކަތްތެރިންގެ އަސާސީ ހައްގުތައް ހިމާޔަތް ކުރުމާ މެދު ރާއްޖޭގައި މަސައްކަތުގެ އިޖުތިމާއީ އަދުލުވެރިކަމާއި އިގުތިސޯދީ ކުރިއެރުމާއި ދެމެހެއްޓެނިވި ތަރައްގީ އާލާކުރުމުގައި އަބުރުވެރި މަސައްކަތްތައް އަދާކުރާ ވަރަށް މުހިންމު ދައުރެއްވާކަން ގަބޫލުކޮށް، ދެނެގަންނަން ޖެހޭ ކަމަށެވެ.
ރާއްޖޭގެ ކޮންމެ މަސައްކަތްތެރިއަކަށް ވެސް އެމީހަކަށް ހައްގުވާ ކަރާމާތާއި އިހުތިރާމް ލިބިދިނުމަކީ މި ސަރުކާރުގެ ވަރަށް ބޮޑު އަމާޒެއް ކަމަށް މާރިޔާ ވިދާޅުވި އެވެ. މަސައްކަތްތެރިންނަށް ހައްގުވާ އިހުތިރާމް، އޭގެ ފުރިހަމަ މާނައިގައި އެ ފަރާތްތަކަށް ލިބިދެވޭނެ ގޮތަށް ސިޔާސަތުތަކާއި އުސޫލުތައް ބައްޓަންކޮށް، އެ ކަންކަން އަމަލުން ދެއްކުމަށް މާރިޔާ ވަނީ އިލްތިމާސް ކުރައްވާފަ އެވެ.
އެއްވެސް މީހަކު ފަހަތަށް ނުޖެހި، ޝާމިލް އަދި ހަމަހަމަ މަސައްކަތްތެރިންގެ މާރުކޭޓެއް އުފެއްދުމަށް ކުރާ މަސައްކަތްތައް ދެގުނައަށް އިތުރުކުރަން ޖެހޭކަން ފާހަގަކުރައްވާ މާރިޔާ ވިދާޅުވި ގޮތުގައި މިއަދު ކުރާ އަމަލުތަކަކީ ކުރިއަށް އޮތް ޖީލުތަކަށް ރާއްޖޭގައި މަސައްކަތް ކުރުމުގެ މުސްތަގުބަލު ބައްޓަންކުރާނެ ކަމެއްކަން އެނގިހުރެ، ކުރިއަށްދާން އަޒުމު ކަނޑައަޅަން ޖެހޭ ކަމުގަ އެވެ.
