ސްޓެލްކޯގެ މެނޭޖިން ޑިރެކްޓަރ ހުސެއިން ފަހުމީ އެކްސްގައި މީގެ ކުޑައިރުކޮޅެއް ކުރިން އެކްސްގައި ކުރެއްވި ޕޯސްޓެެއްގައި ވިދާޅުވީ ރައީސް މުއިއްޒުގެ ގެ ވަޢުދުފުޅާ އެއްގޮތަށް ނިމިދިޔަ ރަމަޟާންމަހު ބޭނުންކޮށްފައިވާ ކަރަންޓަށް ޑިސްކައުންޓް ދިނުމަށް ސްޓެލްކޯއިން ވަނީ ނިންމާފައިވާކަމަށެވެ. އަދި މިހާރު ފޮނުވާފައިވާ ބިލްތައް މި ބަދަލާ އެއްގޮތަށް އަދާހަމަކުރުމަށްފަހު ވީއެންމެ އަވަހަކަށް ކަސްޓަމަރުންނަށް ފޮނުވިގެންދާނެކަމަށެވެ.
މިދިޔަ މަޖލިސް އިންތިހާބުގެ ކެމްޕެއިން ދުވަސްވަރު ބ. އޭދަފުށީގައި ވާހަކަ ދައްކަވަމުން ރައީސް މުއިއްޒީ ވިދާޅުވީ ރޯދަމަހު އާއްމުކޮށް ކަރަންޓާއި ފެން ބިލް ބޮޑުވާތީ ދެން އެހެން ނުވާނެކަމަށެވެ. އަދި ކަރަންޓާއި ފެން ބިލް ކެޕްކުރައްވާނެކަމަށައި ދެން ރޯދަމަހުގެ ބިލް ހުންނާނީ އާންމު މަހެއްގައި ހުންނަވަރަށްކަމަށެވެ.
އެހެންނަމަވެސް ރޯދަ މަސް ނިންމާ ބިލްތައް އައިއިރު ބިލްތައް އިންތިހާއަށް ބޮޑުކަމެއް ބުނެ އާއްމުންގެ ޝަކުވާތައް ސޯޝަލް މީޑިއާގައި ހިއްސާކުރިއެވެ. އެއާއި އެކު މިމަހުގެ 28ގައި ރައީސް އޮފީހުގައި ބޭއްޗި ޕްރެސްއެއްގައި ސްޓެލްކޯއާ ފެނަކައިގެ އެމްޑީ ވިދާޅުވީ ކަރަންޓް ބިލު ބޮޑުވެފައިވަނީ ކުންފުނީގެ މައްސަލައަކުން ނޫންކަމަށާއި އެއީ ކަރަންޓް ރައްޔިތުން ބޭނުންކުރި ވަރުކަމަށެވެ.
މި ޕްރެސްގައި ނޫސްވެރިން ކުރި ސުވާލުތަކަށް ޖަވާބު ދެއްވަމުން ސްޓެލްކޯގެ އެމްޑީ ހުސެއިން ފަހުމީ ވިދާޅުވީ ރައީސް ނިންމަވާފައި އޮތީ ރޯދަމަހު ފޮނުވާ ބިލްތަކުން ލުޔެއް ދެއްވާގޮަތަށް ކަމަށެވެ. އަދި އެކަން ވަރަށް ރަނގަޅަށް ކުރެއްވިކަމަށް ވިދާޅުވިއެވެ.
މިމަހުގެ ކަރަންޓް ބިލުތައް ބޮޑުވެ ޝަކުވާތައް ބޮޑުވެފައި ވަނިކޮށް އަންނަމަހުގެ ވެސް ކަރަންޓް ބިލުތައް ބޮޑުވާނެކަމުގެ އިންޒާރު ފަހުމީ ރޭ ވަނީ ދެއްވާފައެވެ.
