މި ނިންމުމާ ގުޅިގެން، ދެ ގައުމުގެ މެދުގައި ހެދިފައިވާ އެއްބަސްވުންތަކާ ތުރުކީގެ ރައީސް ރަޖަބު ތޮއްޔިބު އުރުދުޣާން ކަނޑައެޅިގެން ހިލާފުވެފައިވާ ކަމަށް އިޒްރޭލުގެ ފޮރިން މިނިސްޓަރު އިސްރާއީލް ކަޓްޒް ވަނީ ތުހުމަތު ކުރައްވައިފަ އެވެ.
ތުރުކީން މީގެ ކުރިން ވަނީ އިސްރާއީލުން ދެމުން އަންނަ ހަމަލާތަކާއި ގުޅިގެން އިސްރާއީލުގެ ބައެއް ޕްރޮޑަކްތައް އެގައުމަށަ އެތެރެ ކުރުމާއި ބޭރު ކުރުން މަނާކޮށްފަ އެވެ.
ތުރުކީގެ މި ނިންމުމާއި ގުޅިގެން އިސްރާއީލުން ވަނީ ކަންބޮޑުވުން ވެސް ފާޅުކޮށްފައެވެ. އެގޮތުން އިސްރާއީލުގެ ފޮރިން މިނިސްޓަރ، ކެޓްޒް އެކްސްގައި ކުރި ޕޯސްޓެއްގައި ބުނެފައިވަނީ ތުރުކީގެ ރައީސް އަންނަނީ ހެދިފައިވާ އެއްބަސްވުންތަކާއި ހިލާފަށް އެކްސްޕޯޓް އަދި އިމްޕޯޓަށް ބަންދަރުތައް ބަންދު ކުރަމުން ކަމަށެވެ.
ގާޒާގައި ހާލުގައި ޖެހިފައިވާ މީހުންނަށް ކާބޯތަކެއްޗާއި އިންސާނީ އެހީގެ ސާމާނު ފޯރުކޮށްދޭން ޔަހޫދީ ފައުޖުން ވެސް ދަނީ ހުރަސް އަޅަމުންނެވެ. މި ގޮތުން, ގާޒާއަށް ކޮންމެ ދުވަހަކު ވެސް އެތެރެވުމުގެ ފުރުސަތު ދެނީ މަދު އަދަދެއްގެ އުޅަނދަކަށެވެ. އަދި, މި ގޮތަށް އެތެރެވެ ގާޒާގެ ތެރޭގައި ދަތުރު ކުރަމުންދާ އުޅަނދުފަހަރަށް ވެސް ޔަހޫދީ ފައުޖުން ދަނީ ހަމަލާ ދެމުންނެވެ. އަދި, އެހީއަށް މަޑުކޮށްގެން ތިބޭ ފަލަސްތީނުގެ މުސްލިމުންނަށް އަމާޒުކޮށް ރަޙުމު ކުޑަ ޙަމަލާތައްދީ, ޔަހޫދީ ފައުޖުން ދަނީ ގިނަ އަދަދެއްގެ ބަޔަކު ޝަހީދު ކުރަމުންނެވެ.
މީގެ ހަ މަސް ކުރިން ޔަހޫދީ ފައުޖުން ފެށި އުދުވާނުގައި ޝަހީދު ކޮށްލާފައިވާ މީހުންގެ އަދަދު މިހާރު ވަނީ 35,596އަށް އުފުލިފަ އެވެ. އޭގެ ތެރޭގައި 25,000އެއްހާ އަންހެނުންނާއި މައުސޫމު ކުޑަކުދިން ހިމެނޭއިރު, ޔަހޫދީ ފައުޖުން ސުންނާފަތިކޮށް ބިމާ ހަމަކޮށްލާފައިވާ އިމާރާތްތަކުގެ ދަށުގައި އިތުރު 10,000އެއްހާ މީހުންގެ ހަށިތައް ތާށިވެފައިވާ ކަމަށް ބެލެވެ އެވެ. އަދި, ޒަހަމު ކޮށްލާފައިވާ މީހުންގެ އަދަދު ވަނީ 77,816އަށް އުފުލިފަ އެވެ. އދއިން ބުނީ, ގާޒާގައި ހައިހޫނު ކަމާ ކުރިމަތިލާން ޖެހިފައިވާ މީހުންގެ އަދަދު މިލިޔަނަކަށް އުފުލިފައިވާ ކަމުގަ އެވެ.
އަދި އަވަހަށް ގާޒާއަށް ފޯރުކޮށްނުދެވިއްޖެނަމަ، ގާޒާގައި ދިރިއުޅޭ އެތައް މިލިއަން ފަލަސްތީނުގެ ރައްޔިތުން ބަނޑައްޖެހޭނެ ކަމުގެ އިންޒާރު އދ. އާއި އެހީފޯރުކޮށްދޭ ދުނިޔޭގެ ބޮޑެތި ޖަމާއަތްތަކުން ދަނީ ދެމުންނެވެ.
