އެފްއޭއެމުން ވެލެންސިއާ ސަސްޕެންޑް ކުރީ، ވެލެންސިއާގެ ކޮންޓްރޯލް އަލުން ހޯދަން، އެފްއޭއެމްގެ ރައީސް ބައްސާމް އަދީލް ޖަލީލްގެ އެކި ގޮތްގޮތުން ކުރި މަސައްކަތް ނާކާމިޔާބުވެފައިވަނިކޮށެވެ.
އެފްއޭއެމްގެ ޑިސިޕްލިނަރީ ކޮމިޓީން ވެލެންސިއާ ސަސްޕެންޑް ކުރިއިރު، ވެލެންސިއާގެ މައްސަލަ ޑިސިޕްލިނަރީ ކޮމިޓީއަށް ހުށަހެޅީ ބައްސާމްގެ ގާތް އެކުވެރިޔާ އަދި ވެލެންސިއާގެ ކުރީގެ ބޯޑް މެންބަރު ހުސައިން ވަހީދު (ދޮނާ) އެވެ.
"އެފްއޭއެމްގެ ޑިސިޕްލިނަރީ ކޯޑްގެ 59 ވަނަ މާއްދާއަށް ރިއާޔަތްކޮށް 61 ވަނަ މާއްދާ މި މައްސަލަ އަށް ތަތުބީގްކޮށް [ހަމަޖައްސައި] ކްލަބް ވެލެންސިއާގެ އޭޖީއެމް އަދި ހިންގާ ކޮމިޓީގެ އިންތިހާބު ކްލަބް ވެލެންސިއާގެ ހިންގާ ގަވާއިދާއި އެފްއޭއެމްގެ އަސާސީ ގަވާއިދު އަދި އިލެކްޓޯރަލް ކޯޑާއި އެއްގޮއްވާ ގޮތުގެމަތިން ބާއްވައި އެފްއޭއެމް އަށް ވިލަރެސް ކުރެވޭހެން ވެލެންސިއާގެ ހިންގާ ކޮމިޓީ ސައްހަ ގޮތުގައި އަލުން އިންތިހާބުކޮށް ނިމެންދެން ކްލަބް ވެލެންސިއާ ފުޓްބޯޅައިގެ އެންމެހައި ކަންކަމުން ސަސްޕެންޑް ކޮށްފީމެވެ،" ޑިސިޕްލިނަރީ ކޮމިޓީގެ ޗެއާމަން އަލީ ޝާހް ސޮއި ކުރައްވައި ވެލެންސިއާ އަށް ފޮނުވި އެންގުމުގައި ވެއެވެ. އެހެންނަމަވެސް މި ނިންމުމުގެ އެއްވެސް މައުލޫމާތެއް މިހާތަނަށް ފީފާއަކަށް އަދި އޭއެފްސީއަކަށްވެސް އަންގާފައިނުވާ ކަމަށްވަނީ މައުލޫމާތު ލިބިފައެވެ.
ވެލެންސިއާއިން ބުނެފައި ވަނީ، އެ ކްލަބް ސަސްޕެންޑް ކުރީ އެފްއޭއެމްގެ އިންތިހާބުގައި ވެލެންސިއާއިން ބައްސާމަށް ތާއީދު ނުކުރުމުން ކަމަށެވެ.
