އައްޑޫ ސިޓީގެ ގުޅިފައިވާ ރަށްތަކަށް ފެން ލިބުމުގައި ދިމާވެފައިވާ މައްސަލައަށް ހައްލެއް ނުލިބި މަހެއްހާ ދުވަސްވެފައިވާކަމަށް ވިދާޅުވެ އެކަމުގެ ކަންބޮޑުވުން މޭޔަރު އަލީ ނޒާރު ވަނީ މިދިޔަ ހޮނިހިރު ދުވަހު ފާޅުކުރައްވާފައެވެ.
ފެނުގެ މައްސަލަ ހައްލުނުވެ ގިނަ ދުވަސްވުމުން ރައްޔިތުންގެ ޝަކުވާ ވަނީ އިތުވެފައިކަމަށެވެ. އަދި މިކަން ހައްލު ނުވެ އޮތުމަކީ ފެނަކައިގެ ނުކުޅެދުންތެރިކަންކަމަށްވެސް އަލީ ނިޒާރު ވިދާޅުވިއެވެ.
މިކަމާއި ގުޅިގެން ފެނަކައިން މިއަދު ނެރުނު ބަޔާނެއްގައި ބުނީ އައްޑޫ ސިޓިގެ އަބާދީ ބޮޑުވުމާއި އެކު އެ ކުންފުނިން ފެން އުފައްދާ މިންވަރު ދުވަހެއް ދުވަހަކަށް ދަނީ އިތުރުވަމުންކަމަށެވެ. އެހެންކަމުން މިހާރު ބަހައްޓާފައިވާ ޕްލާންޓުން އުފެއްދޭ ފެނަށްވުރެ ބ\ޭނުންކުރާ ފެނުގެ ނިސްބަތް އިތުރުވެފައިވާކަމަށް ފެނަކައިން ބުނެއެވެ. އެ ކުންފުނިން ބުނީ އައްޑޫ ސިޓީގެ ފެނުގެ ހާލަތު ދަށަށް ދިޔައީ މިދިޔަ ސަރުކާރުގެ އިހްމާލުންކަމަށެވެ.
ފެނަކައިން ބުނީ އައްޑޫ ސިޓީގެ ފެނުގެ ފެނުގެ ނިޒާމު އަޕްގްރޭޑް ކުރުމަށް މިހާރު އެމްޑަބްލިއުއެސްސީ އާ ހަވާލުކޮށްފައިވާކަމަށެވެ. އަދި މި މަސައްކަތް ނިމިގެންދާއިރު އައްޑޫ ސިޓީއަށް ދިމާވެފައިވާ ފަނުގެ ދަތިކަމަށް ދާއިމީ ހައްލެއް ލިބިގެން ދާނެކަމަށެވެ. އަދި މިހާރުވެސް ހިދުމަތް މެދުނުކެނޑި ކުރިޔަށްް ގެންދިޔުމަށް ކުރަންޖެހޭ ކަންކަން ކުރަމުން އަންނަކަމަށްވެސް ފެނަކައިން ބުނެއެވެ.
ފެނަކައިން ބުނީ މަސައްކަތް ކުރަނީ އެ ކުންފުނި ވެއްޓިފައިވާ އަނދަވަޅުން ސަލާމަތްކޮށް ކުންފުންނާއި މެދު ރައްޔިތުންނަށް ގެއްލިފައިވާ އިތުބާރު އިއާދަކޮށްދިނުމަށްް ކަމަށެވެ.
އައްޑޫ ސިޓީގެ ފެނާއި ކަރަންޓާއި ދޭތެރެ ދޭތެރެއިން އަންނަނީ މައްސަލަ ޖެހުމުންނެވެ. އަޑޫ ސިޓީގެ ފެނުގެ ނިޒާމު އަޕްގްރޭޑް ކުރަން ސަރުކާރުން ވަނީ ދާދި ފަހުން 282 މިލިއަން ރުފިޔާއަށް އެމްޑަބްލިއުއެސްސީ އާއި ހަވާލުކޮށްފައެވެ. އަދި ފެނަކައިން ހިންގަމުން އައި ފެނޭ ނަރުދަމާގެ 16 މަޝްރޫއެއްވެސް އެމްޑަބްލިޔުއެސްސީ އާ ހަވާކުރުމަށް ވަނީ ނިންމާފައެވެ.