މިއަދު "އެކްސް" ގައި ކުރެއްވި ޕޯސްޓެއްގައި ރައީސް ވިދާޅުވީ މީހަކަށް ކުރެވޭ ކުށެއްގެ ނާޖާއިޒު ފައިދާ ނަގައި، އެއްވެސް މަގުސަދެއްގައި ވީޑިއޯކޮށް އާންމުންގެ ތެރޭގައި ފަލީހަތްކޮށް ހެދުމަކީ އަހުލާގީ ގޮތުންނާއި އިޖުތިމާއީ ގޮތުން ބަލާއިރު އެއްގޮތަަކަށް ވެސް ކޮށްގެން ވާނެ ކަމެއް ނޫން ކަމަށެވެ.
ރައީސް މިހެން ވިދާޅުވެފައި ވަނީ ކުރީގެ ހޯމް މިނިސްޓަރު އަދި އަދާލަތު ޕާޓީ ރައީސް، އިމްރާން އަބްދުﷲ ގެ ކާރުގައި އަމިއްލަ މީހެއްގެ ޕިކަޕަކުން ޖެހުނު މައްސަލައިގެ ތެރެއަށް ހެންވޭރު ދެކުނު ދާއިރާގެ އިންތިހާބީ މެންބަރު ހުސައިން އިމްރާން ލަތީފް ވެދެވަޑައިގެން ޕިކަޕުގެ ޑްރައިވަރަށް މައާފުކޮށްދޭން މިނިސްޓަރު އިމްރާންގެ ކިބައިން އެދިވަޑައިގަންނަވާ ވީޑިއޯއެއް ދައުރުވެފައި ވަނިކޮށެވެ.
ކުށެއް ކޮށްފި މިީހަކާ މެދު ކަންކުރާނެ ގޮތް ގާނޫނުގައި ބަޔާންކޮށްފައިވާކަން ފާހަގަކޮށް ރައީސް ވިދާޅުވެފައި ވަނީ އެކަމަށް ފިޔަވަޅުއަޅަން މުއައްސަސާތަކާއި ގާނޫނީ ނިޒާމް ގާއިމުވެފައިވާ ކަމަށެވެ.
ރައީސް ވަނީ އަހަރެމެން އެންމެންނަކީ އޯގާތެރި، ކުލުނުވެރި އަދި ޒިންމާދާރު މުޖުތަމައެއް ބިނާކުރުމުގައި ޒިންމާދާރު ބަޔަކަށް ވުމަށް އިލްތިމާސް ކުރައްވާފަ އެވެ.
