ރައީސް ނަޝީދަށް 2021 ވަނަ އަހަރުގެ މެއި މަހުގެ ހަ ވަނަ ދުވަހުގެ ރޭ ދިން ބޮމުގެ ހަމަލައަށް ތިން އަހަރު ވުމާ ގުޅިގެން މަޖިލީހުގެ މިއަދުގެ ޖަލްސާ ފައްޓަވަމުން އަސްލަމް ވިދާޅުވީ މައްސަލައިގެ ތަހުގީގު އަވަސް ކުރަން ޖެހޭ ކަމަށެވެ. އަދި މައްސަލަ އާ ގުޅުންހުރި ޝަރީއަތްތައް ނިންމުން މުހިންމުވެފައި ބޭނުންތެރި ކަމަށް ވެސް އަސްލަމް ވިދާޅުވި އެވެ.
މަޖިލިސް ރައީސްކަމުގެ މަގާމުގައި ހުންނަވަނިކޮށް ރައީސް ނަޝީދަށް ދިން ހަމަލާގެ ސަބަބުން ބޮޑެތި އަނިޔާތަކެއްވެ، ބޮޑު އޮޕަރޭޝަނެއް ކުރަން ޖެހިވަޑައިގަތުމާ ގުޅިގެން އެ އާލާސްކަންފުޅުގައި އެމަނިކުފާނު ގިނަ ދުވަސްތަކެއް ވަންދެން އުޅުއްވި އެވެ.
މި މައްސަލައިގެ ތަހުގީގަށް ކުރީގެ ރައީސް އިބްރާހިމް މުހައްމަދު ސޯލިހު އައްޔަންކުރެއްވި މަންދޫބު، އިނގިރޭސި ވިލާތުގެ އައްބާސް ފާއިޒް މީގެކުރިން ވިދާޅުވެފައި ވަނީ މި ހަމަލާދިން ބައިވެރިންގެ މައްޗަށް ކުރާ ޝަރީއަތް ލަސްވާ ކަމަށް ކަމާ ގުޅުންހުރި އިދާރާތަކުން ބުނާ ސަބަބުތައް ބަލައި ނުގަނެވޭ ކަމަށެވެ.
ދައުލަތުން މި މައްސަލާގައި ދައުވާކުރަނީ މއ. ފޭރުގޭ މުޖާޒް އަހުމަދަށާއި ގއ. ކޮނޑޭ، ފޮޅޭމާ ތަހުމީން އަހުމަދަށާއި ނ. މަނަދޫ، ނޫރީގޭ އަލީ ހައިޝަމަށާއި ގއ. ވިލިނގިލީ، ހުދުރުވާގޭ ފަހުމީ އަލީއަށާއި މ. ކުދެހިގޭ އިސްހާގާ އަދި އއ. މާޅޮސް، އަސަރީގޭ މުހައްމަދު ނާޒިމްގެ މައްޗަށެވެ.
