ރައީސް އޮފީހުގައި މިއަދު ބޭއްވި ނޫސްވެރިންގެ ބައްދަލުވުމުގައި ހީނާ ވިދާޅުވީ އަންހެން މަޖިލިސް މެމްބަރުންނަށް ވެސް އެލަވަންސް ލިބި އެކަން ހަމަޖެހިގެންދާނީ އާ މަޖިލީހުގެ މަސައްކަތް ފެށުމާއިއެކު ކަމަށެވެ.
ރައީސް ޑރ. މުހައްމަދު މުއިއްޒު ވަނީ ރައީސުލްޖުމްހޫރިއްޔާގެ މަގާމަށް އިންތިހާބުވެވަޑައިގަތުމުގެ ކުރިން، އެމަނިކުފާނުގެ ރިޔާސީ ކެމްޕެއިިންތެރެއިން މަޖިލީހަށް އިންތިހާބުވާ އަންހެން ބޭކަނބަލުންނަށް ހާއްސަ އެލަވަންސްއެއް ދެއްވާނެމަށް ވައުދުވެވަޑައިގަނެފަ އެވެ. އަދި އިސް މަގާމުތަކާއި، ސިޔާސީ މަސައްކަތަށް އަންހެނުން ނެރެ ބާރުވެރިކުރުވުމަކީ ރައީސް މުއިއްޒުގެ ވައުދުފުޅެކެވެ.
ސިޔާސީ މައިދާނުގައި އަންހެނުންގެ ބައިވެރިވުން ކުޑަވުމަކީ އަބަދުވެސް ދެކެވޭ ވާހަކައެކެވެ. ނަމަވެސް ހައްގުތައް ހޯދުމަށް ވަކާލާތު ކުރަން އޮތް މަޖިލީހުގައި ވެސް ދައުރަކަށްވުރެ ދައުރެއް އަންނަނީ އަންހެނުންގެ ނިސްބަތް މަދުވަމުންނެވެ. 17 ވަނަ މަޖިލީހުގައި ފަސް އަންހެން މެންބަރުން ތިއްބެވި އެވެ. ނަމަވެސް ޖެހިގެން އައި 18 ވަނަ މަޖިލީހާއި 19 ވަނަ މަޖިލީހުގައި ވެސް ތިއްބެވީ އެންމެ ހަތަރު މެންބަރުންނެވެ. 20 ވަނަ މަޖިލީހުގައި އެންމެ 3 އަންހެން މެންބަރުންނެވެ.
20 ވަނަ ރައްޔިތުންގެ މަޖިލީހުން ޖާގަ ހޯއްދެވި ތިން އަންހެން ކެންޑިޑޭޓުންނަކީ ފ. ނިލަންދޫ ދާއިރާއަށް ޕީއެންސީގެ ޓިކެޓުގައި ވާދަކުރެއްވި، ފާތިމަތު ސައުދާ އާއި މާފަންނު މެދު ދާއިރާއަށް ޕީއެންސީގެ ޓިކެޓުގައި ވާދަކުރެއްވި އަސްމާ ރަޝީދުގެ އިތުރުން ކ. ހުރާ ދާއިރާއަށް އަމިއްލަގޮތުން ވާދަކުރެއްވި އަނާރާ ނައީމް އެވެ.
