ގާތްގަނޑަކަށް 600 ނުވަތަ 700 އަހަރު ވެފައިވާ މި މިސްކިތް ތަރިކައިގެ ލިސްޓުގައި ހިމެނުމާއި ގުޅޭގޮތުން ދިވެހިބަހާއި ސަގާފަތާއި ތަރިކައާބެހޭ ވަޒީރު އާދަމް ނަސީރު އިބްރާހީމާއި މާމިގިލީ ކައުންސިލްގެ ރައީސް އިމާދު ފާރޫގު ވަނީ މަޝްވަރާކުރައްވާފައި އެވެ. އަދި މި ބައްދަލުވުމުގައި ކައުންސިލުން ވަނީ ތަރިކައިގެ ލިސްޓުގައި މި މިސްކިތް ހިމެނުމަށް އެދިފަ އެވެ.
ތަރިކައިގެ ލިސްޓު އެކުލަވާލާފައި ވަނީ ދިވެހި ތާރީހު ދިރާސާކުރާ މީހުންގެ ފޮތްތަކާއި ރަށު ކައުންސިލްތަކުން ލިބިފައިވާ މައުލޫމާތުގެ މައްޗަށް ކަމަށް މިނިސްޓްރީން ބުނެ އެވެ.
މިދިޔަ ސަރުކާރުގައި ވެސް ތަރިކައިގެ ތެރޭގައި ހިމެނުމަށް ވާހަކަދެކެވުނު ނަމަވެސް، މިސްކިތުގައި މުށި ޖަހާފައި ހުރުމުން އެކަން ނުވި ކަން މާމިގިލީ ކައުންސިލް ފާހަގަކުރި އެވެ.
އެހެންވެ، މިސްކިތުގެ މުށިތައް މިހާރު ތަޅާލާފައިވާ ކަމަށާއި ކައުންސިލުގެ ވިސްނުމަކީ ތަރިކައިގެ ލިސްޓުގައި ނުހިމެނިޔަސް އެތަން ތަރިކައިގެ ގޮތުގައި ބޭނުންކުރުން ކަމަށް މާމިގިލީ ކައުންސިލް ބުންޏެވެ.
މި ލިސްޓުގައި 400 އަށް ވުރެ ގިނަ ތަރިކަ އަށް ކިޔާ ނަމާއި، އެތަނެއް ހުރި އަތޮޅާއި ރަށުގެ އިތުރުން އެއީ ކޮންބާވަތެއްގެ ތަރިކަ އެއްކަމާއި ކުރު ތަފްސީލެއް އެކުލަވާލާފައި ވެ އެވެ. އާސާރީ ތަރިކަ ބަހާލައިފައިވާ ކެޓަގަރީތަކުގެ ތެރޭގައި ތަކެތި، އިމާރާތް، ބިނާ، ސަރަހައްދު، ގަސްގަހާގެހި އަދި މީހުން ވަޅުލާފައިވާ ތަންތަން ހިމެނެ އެވެ.
